ARRAPI-US cooperation lalakas — Romero

MANILA, Philippines — Sinabi ni dating House Deputy Speaker at Philippine Air Force Reserve Col. Mikee Romero na masuwerte siya sa pagkakaroon ng pagkakataong makausap ang chairman ng US Joint Chiefs of Staff, kamakailan.

Ayon kay Romero, chairman ng Association of Reservists and Reserve Administrators of the Philippines (ARRAPI), ang kanyang pakikipag-usap kay Gen. Dan Caine ay isang mala­king hakbang sa pagpapatibay sa kooperasyon sa pagitan ng mga American citizen-soldiers at ng Armed Forces of the Philippines (AFP) Reserve Force.

Isa si Romero sa 25-strong senior officials ng AFP at ARRAPI na nakibahagi sa 147th National Guard Association of the United States (NGAUS) General Assembly and Conference sa Milwaukee, Wisconsin kung saan si Caine ang keynote speaker.

Gusto rin ni Caine, isa sa mga pinagkakatiwalaang military leaders sa Trump administration, na bumisita sa bansa na labis na ikinatuwa ng Phl delegation.

Sa talumpati ni Caine ay nakumbinsi si Romero na maaaring palakasin ng AFP reserve force ang sarili nilang humanitarian at disaster-response coordination.

Nakatuon si Romero para sa isang joint training at exchange programs sa US counterparts para pataasin ang kakayahan na makaresponde sa panahon ng kalamidad.

Kapwa iginiit nina Caine at Romero ang kahalagahan ng papel na ginagampanan ng kanilang mga grupo sa kasalukuyang security at humanitarian challenges.

Nakiisa naman si Romero at kanyang mga kapwa reservists sa flood relief missions sa Bulacan kung saan nila natulu­ngang lumikas ang higit sa 7,500 tao na naapektuhan ng bagyong “Crising”.

Bilang senior deputy speaker at vice chairman ng bicameral conference committee, naging susi si Romero sa pagkakaroon ng pambili ng C-130J-30 Hercules aircraft noong 2022 — critical assets para sa tactical airlift, logistics, at disaster-response missions.

Nakatakda itong ideliber sa bansa sa 2026 at 2027.