Ethics complaint vs De Lima, Trillanes, Lacson ibinasura

MANILA, Philippines — Ibinasura ng Senate panel ngayong Martes ang ethics complaint laban kina Sen. Leila de Lima, Sen. Panfilo Lacson at Sen. Antonio Trillanes IV.

Lack of jurisdiction ang dahilan sa pagkakabasura ng reklamo laban sa tatlong senador, ayon kay Senate ethics committee head Sen. Vicente Sotto III.

Inireklamo sina Lacson at Trillanes ni dating Customs commissioner at ngayo’y Office of Civil Defense Deputy Administrator III Nicanor Faeldon.

Nag-ugat ito sa paratang ng dalawang senador na tumanggap ng milyung-milyong halaga ng suhol si Faeldon noon nakaupo pa sa Bureau of Customs.

Nabasura rin ang reklamo laban kay de Lima dahil sa umano’y utos niya sa dating driver na si Ronnie Dayan na huwag dumalo sa pagdinig ng Kamara.

Naaresto si Dayan noong Nobyembre 2016 matapos magtago at hindi sumipot sa pagdinig.

Nakakulong naman ngayon si de Lima sa Philippine National Police custodial center dahil sa umano’y pagtanggap ng pera mula sa drug lords ng New Bilibid Prison.