RP no. 2 sa may pinakamaraming basura sa karagatan

MANILA, Philippines - Pumapangalawa na ang Pilipinas sa may pi­na­karaming basurang na­kuha sa karagatan base sa ulat ng Ocean Conservancy Organization na naka-base sa Amerika.

Nanguna sa listahan ang Estados Unidos at ikatlo ang Costra Rica.

Kaugnay nito, isinu­long ni Senator Ramon “Bong” Revilla ang Senate Bill 777 na nagla­la­yong ikulong ang sinu­mang magtatapon ng solid, toxic, hazardous o kahit na domestic garbage sa dagat, beach, ilog, at iba pang daanang tubig sa loob ng teritoryo ng Pilipinas.

Ayon sa Ocean Conservancy, may 1,355,236 piraso ng basura ang na-recover mula sa mga bahagi ng karagatan at baybaying-dagat ng Pili­pinas sa kanilang isina­gawang International Coastal Clean-up noong Setyembre ng nakaraang taon. Nanguna sa lista­han ang Estados Unidos sa pinakamaraming ba­surang nakuha, na uma­bot sa 3,945,855 piraso. Ikatlo ang Costa Rica na may 1,017,621 piraso.

Nanguna sa talaan ng mga trash items na naku­ha mula sa mga karaga­tan ng Pilipinas ay mga plastic bags (679,957 piraso), paper bags (253,013) at food wrappers (103,226).

Nakalap rin ang 38,394 piraso ng damit at sapatos, 55,814 tobacco-related items kabilang ang mga upos ng sigarilyo (34,154), lighters at kaha, gayundin ang 11,077 diapers.

Sinabi ni Revilla na maliwanag na ginawa ng “open dumpsite” ang ka­ragatan dahil sa kawalan ng batas na maaaring ipataw sa mga nagta­tapon ng basura.