Wala kauyon?

CEBU, Philippines - Mitingog gyud si Julia Barretto mahitungod sa espekulasyon nga wala makauyon ang pamilya sa iyang onscreen partner ug gidungog nga suitor nga si Joshua Garcia ngadto kaniya. "Dahil sa side niya po sa Batangas na pamilya niya hindi ko pa po nakikilala. It's unfair naman sa aming dalawa na ginagawan kami ng kuwento na wala naman kaming ginagawang masama”, suma pa ni Julia.

Dili magdali

Uyon ra usab si Luis Manzano sa  komento  sa inahan ni Jessy Mendiola nga si Didith Garvida nga dili una magdali sa pagpakasal. Nagpasalamat usab ang host ngadto kang Didith gumikan kay aprubado niini ang ilang relasyon.

Magkarelasyon na

Gikumpirmar pinaagi sa Instagram account ni Barbie Forteza nga aduna na sila’y espesyal nga relasyon sa iyang usa sa mga kapares sa seryeng Meant To Be nga si Jak Roberto. Matud pa sa iyang post, hangyo niya nga unta molungtad og dugay  ang ilang relasyon.

Wonder Woman

Gisumsuman karon sa social media ang imahe ni Kathryn Bernardo human kini nagsul-ob og ala Wonder Woman costume atol  sa iyang production number sa ASAP. Daghan ang nag-ingon nga angayan nga modala si Kathryn og usa ka superhero nga karakter.

Nangayo’g pasaylo

Wala gyud makapugong si Christian Bables sa pagtulo sa iyang mga luha sa dihang mi-guest sila sa iyang igsuon nga si CJ sa Magandang Buhay kagahapon. Emosyonal ang maong episode gumikan kay nangayo siya og pasaylo ni CJ tungod kay wala gyud kini nakahatag og higayon sa pagsaksi sa pagtubo niini tungod sa iyang trabaho. Mapasalamaton ra usab si Christian gumikan kay misabot ra gyud ang iyang mga igsuon tungod kay siya na mismo ang nibarog isip amahan sa ilang pamilya.

Unya ra

Bisan og excited na si Vice Ganda alang sa pelikula nila ni Pia Wurtzbach nga  "Gandara versus Gwapito: The Revengers" nga lakip usab sa MMFF 2017, giangkon sa TV host nga dili pa gyud siya andam nga maka-eksena ang beauty queen. Mihangyo usab si Vice nga pataud-tauran una ang ilang panagkita ug mga eksena gumikan kay magpadaot una siya.

Sakripisyo ni Empoy

Gibutyag sa inahan ni Empoy Marquez nga si Cecil Ramos nga bata pa lang ang komedyante, aduna na kini bug-at nga responsibilidad nga gidala human sa panagbuwag nila sa amahan niini. Matud pa ni Cecil nga nanarbaho si Empoy isip tigtahi sa photo album ug nahimo usab kini nga fast food crew aron adunay magasto sa pagtungha sa mga igsuon niini. Karon nga 14 years na kini sa showbiz, mapasalamaton siya sa anak nga mipalit gyud kini og balay ug yuta. Dugang pa nga nakapatukod na kini og negosyo nga usa ka kan-anan.

Recording artist na

Usa na gyud ka-recording artist ang child  star nga si Baeby Baste gumikan gilusad na ang iyang dance song nga nag-ulohan og  “Bastelicious” atol sa pagsaulog sa adlaw’ng natawhan  niini niadtong Sabado sa Eat Bulaga. Gibahin usab ni Baste nga maka-LSS ang iyang kanta ug lingaw gyud kini paminawon.

Nilupad sa Japan

Human sa pagsaulog sa adlaw’ng natawhan sa kinamanghurang anak ni Diana Zubiri nga si Baby Aliyah, nilupad gyud kini dayon sa Japan aron magbakasyon. Malipayon usab si Diana nga nabitbit niya ang iyang mga anak gumikan kay dugay na kini niya nga gihandum nga madala kini niya sa laing nasud.

Hangyo sa fans

Gianunsyo ni Asia’s Songbird nga si Regine Velasquez sa iyang Instagram account nga duha ka petsa ang iyang  concert karong umaabot nga Oktubre 21 ug 22 sa Mall of Asia Arena. Matud pa ni Regine nga gipun-an og usa ka adlaw ang iyang concert gumikan kay daghan ang mihangyo kaniya nga papun-an kini.  (BANAT NEWS)