UC Webmasters mopahigayon og basketball tryouts
CEBU, Philippines — Ang mga basketbolista nga buot mamahimong miyembro sa University of Cebu (UC) Webmasters college varsity team sa Cebu Schools Athletic Foundation, Inc. (CESAFI) dunay higayon sa pagbuhat niini.
Kini tungod kay si Webmasters head coach Atty. Kernn Sesante mopahigayon og open tryouts karong Hunyo 18-19 diha sa YMCA Gym sa Osmeña Boulevard, dakbayan sa Sugbo.
Si Sesante, usa ka utokan nga point guard nga nagsilbeng team captain sa Webmasters atol sa iyang panahon sa primerong inter-school nga liga sa Sugbo, maoy modumala sa duha ka adlaw nga pagpangita og mga talento kauban ang iyang mga assistant coaches.
Ang hinashasay modagan og tulo ka oras matag adlaw, gikan sa alas-9 sa buntag ngadto sa alas-12 sa udto.
Nanghinaut si Sesante nga makasigpat og potensiyal nga mga atleta kay ang Webmasters nagtinguha nga palig-onon ang ilang puwersa alang sa umaabot nga CESAFI Season 25, nga gikatakdang sugdan karong Septiembre 13 sa Cebu Coliseum.
- Latest
