Tofil kampiyon sa Buildrite Cup
CEBU, Philippines — Ang Tofil Finishing nakaipsot sa Stopgap Sealants, 60-57, aron langkaton ang kampiyonato sa Buildrite Cup 2023 nga gipasiugdahan sa Architects+Engineers Basketball didto sa Cebu Port Authority (CPA) gym ning bag-ohay pa lamang.
Si Arnel Cordero mirehistro og double-double nga 17 puntos ug 10 ka rebounds nga iyang gipalamanan og upat ka assists, duha ka steals ug duha ka blocks alang sa Tofil hinungdan sa pagbayaw kaniyang Finals Most Valuable Player.
Mihimo sab og kasikas si John Gayotin uban ang 14 puntos ug upat ka rebounds alang sa Tofil. Si Randy Lomera milansang og tulo ka 3-pointers sa iyang nuybe puntos samtang si Patrick Paran midugang og otso puntos ug lima ka rebounds.
Sila si Joshua Gayotin ug Dexy Suico mihipos og 11 puntos matag usa samtang si Richie Bactol mi-iskor og 10 apan nangahoyhoy ang ilang mga abaga sa kampo sa Stopgap.
Sa laing kulbahinam nga sangka alang sa ikatulong dapit, ang Smartbond nakalingkawas batok sa Blockout og usa lamang ka lugas.
Si Jett Latonio, nga maoy conference MVP, mipabuto og 24 puntos, 12 ka rebounds, ug tilo ka assists alang sa Smartbond. Nakakuha siya og dakong suporta gikan ni Wesley Viejo nga mipupo og 14 puntos ug 10 ka rebounds.
Sila si Sean Chan ug John Tangapa nagkumboya'g 43 puntos samtang si Manuel Veloso mikadlit og 14 puntos sa pilderong Blockout. (BANAT NEWS)
- Latest
