Minglanilla wa gihapoy pilde sa Gullas Cup

CEBU, Philippines — Si JC Rex Sanguenza mipabuto og 21 puntos sa dihang gikastigo sa Abante Minglanilla ang defending champion San Fernando Buffalos, 72-56, aron pagpabiling way pilde sa Rhea Gullas Cup 2024 First District of Cebu Inter-City/Municipality Sports Festival niadtong Dominggo didto sa Minglanilla Sports Complex.

Mangtas kaayo si Sanguenza nga mipasud og pito sa 12 niya ka itsa ug way sipyat sa unom niya ka free throws. Mipupo sab siya og pito ka rebounds, duha ka assists ug pito ka steals alang sa Minglanilla, nga mipahugot sa ilang pagkupot sa liderato bitbit ang perpektong 3-0 nga baraha.

Si Christian Andrew Amaba mi-iskor og otso puntos ug milagkat og 11 ka rebounds uban ang usa ka assist ug upat ka steals alang sa Minglanilla nga mitali sa nag-unang sayes puntos sa duwa ug wala na molingi pa sukad misutoy ngadto sa dakong 39-21 nga labaw sa halftime.

Si Alfonso Aurio, Jr. mihipos og 22 puntos, unom ka rebounds, ug duha ka assists apan way nahimo gumikan kay ang San Fernando nasukgamak sa ikaduha nilang pilde sud sa tulo ka sinugdanan.

Sa laing mga aksiyon, ang Talisay Aksyon Agad ug Naga Atong Garbo mibugha sa tagsa-tagsa nila ka mga karibal aron inaton ang ilang rekords ngadto sa 2-1.

Si John Mark Lasola miharos og 24 puntos, tulo ka rebounds, duha ka assists, ug upat ka steals aron agakon ang Talisay ngadto sa 87-76 nga pagpasaop sa Sidlak Carcar.  Nakakuha si Lasola og dakong suporta gikan nilang Zeyth Nichol Alvarez ug Kelaiah Josham Tapic uban ang 10 puntos matag usa alang sa Talisay, nga dominado kaayo ang duwa sukad mibulhot sa sayong 20-8 nga bentaha.

Sa pikas nga sangka, sila si John Carlo Bastismo ug Rex Marcian Albiso nagkumboya'g 25 puntos sa dihang gipatilaw sa Naga ang nagkagidlay nga Blissful Sibonga sa ikatulo niining sunod-sunod nga kaparotan, 81-64.