Mga Pinoy misidlak sa Asian Juniors Chess C'ship

CEBU, Philippines — Ang mga pambato sa Pilipinas nga gipangulohan ni International Master Michael Concio, Jr. mikuha og atensiyon sa Asian Juniors Chess Championships nga natapos kagahapong adlawa didto sa Knights Templar Hotel sa Tagaytay.

Giusban og pilde ni Concio si IM Saha Neelash sa ikasiyam ug katapusang hugna aron pagtapos sa ikaduhang dapit sunod ni IM G B Harshavardhan sa India nga maoy nakampiyon uban ang 7.0 puntos.

Gihuman sa 17-anyos nga si Concio ang malisud nga torneyo bitbit ang 6.5 puntos aron birahon ang silver medal. Wa siya'y pilde sa sa siyam ka duwa diin upat ang iyang daog ug lima ang tabla.

Sa sayo pa, gipilde ni Concio si Harshavardhan aron langkaton ang korona sa rapid event.

Gawas ni Concio, mikuha sab og atensiyon ang kababayan niyang si Eric Labog, Jr, nga mipakurat ni FIDE Master Daniel Hermawan sa Indonesia aron pagpahiluna sa ikalimang puwesto uban ang 6.0 puntos.

Gawas niini, nasakmit sab ni Labog ang titulo isip IM.

Samtang ang laing Pinoy nga si Mark Jay Bacojo naapil sa top 10 uban ang 5.5 puntos.