TESDA-7 Friendly Chessfest  kasado na

CEBU, Philippines — Ang Technical Education and Skills Development Authority-Central Visayas mopahigayon sa labing una niining Friendly Chess Tournament karong Miyerkules, Marso 9, sa TESDA-7 lobby.

Gipangulohan ni TESDA-7 Regional Director Gamaliel “Gam” Vicente Jr., nga usa sab ka tadhang magduduwa og ahedres, ang kompetisyon abli lamang sa empleyado ug trainees sa TESDA-7 compound. Walay registration fee apan kadtong interesado mosalmot giabisohan nga magdala sa kaugalingon nilang chess board. Sugdan ang torneyo sa ala 1:30 sa hapon ug mosunod dayon ang awarding ceremony sa alas-4 sa hapon. Ang nag-unang tulo ka mananaog makadawat og ganting salapi. Ang makampiyon mobulsa og P3,000, samtang ang mopahiluna sa ikaduha ug ikatulong dapit mokubra og P2,000 ug P1,000.