Rockets mi-trade ni Westbrook sa Wizards

CEBU, Philippines — Gihatag sa Houston Rockets ang hangyo ni Russell Westbrook nga magpabalhin sa laing team. Segun sa taho nilang Shams Charania sa The Athletic ug Adrian Wojnarowski sa ESPN, ang Rockets misugot nga i-trade si Westbrook ngadto sa Washington Wizards hulip ni John Wall ug usa ka first-round pick.

Ang Wizards maoy ikatulong NBA team ni Westbrook sud sa tulo ka sagunson nga tuig.

Naghiusa sab kini og balik sa 2016-2017 MVP uban ni Wizards coach Scott Brooks. Nagkauban sila kanhi sa Oklahoma City Thunder gikan sa 2008 ngadto sa 2015.

Human sa 11 ka tuig sa OKC, ang 32 anyos nga si Westbrook mitapon sa Houston sa usa ka trade nga naghatod ni Chris Paul ngadto sa Thunder nadtong 2019.

Si Westbrook, siyam ka higayon nahimong All-Star ug kaduha na-scoring champion, mi-average og 27.2 points, 7.9 rebounds ug 7.0 assists sa miaging season.

Sa iyang bahin, si Wall mipakita'g aksiyon sa entiro siyam niya ka season uban sa Wizards nga mikuha kaniyang No.1 overall pick sa 2011 Draft.

Apan ang 30-anyos nga si Wall wala makaduwa bisan kausa sa miaging season tungod sa sunod-sunod nga injury. Sa kinatibuk-an sa iyang karera, ang five-time All-Star guard mi-avarage og 19.0 points ug 9.2 assists matag duwa.