Parks misaad nga mamawi

CEBU, Philippines — Gusto na hikalimtan ni Ray Parks Jr. ang bati niya nga gipakita sa unang duwa niya uban sa TNT KaTropa niadtong Biyernes.

Si Parks gilihian og pilde dihang gibihiag sila sa Barangay Ginebra Kings, 93-96.

Ang kanhi NBA D-League cager mitapos sa duwa dala ang 17 puntos, apan wala siya matagbaw sa iyang gipakita ilabi na nga pakyas siya pagtabang sa KaTropa nga mudaog.

“I take full responsibility for the loss. Talk ‘N Text is a great group and I’m still adjusting but the guys did a great job of taking me in. I have to step up to the plate and be better,” matud pa ni Parks sa Spin.ph.

Si Parks miingon nga nabag-ohan pa siya sa sistema ni coach Bong Ravena, apan misaad nga mas mahimong epektibo kung mugana na ang iyang opensa uban sa TNT.

Si Parks mihulagway sa TNT nga dako og kalahian sa una niyang koponan nga Blackwater Elite.

Ang two-time ABL MVP may kahigayunan nga mohimo og nindot nga duwa sa katapusang sangka sa TNT sa elimination round batok Magnolia Hotshots karong Nobiyembre 16 didto sa Davao City.