Dakong hagit ni Santisima

CEBU, Philippines – Sa tuyo nga mailhan isip sunod world title contender gikan sa ALA Boxing Gym, si Jeo 'Santino' Santisima midawat sa hagit nga makigsangka sa labing una niyang Mehikanong kaatbang.

Sukdon ang abilidad ni Santisima (16-2, 14KOs)  sa iyang pagdepensa sa WBO Oriental super bantamweight title batok Mexican champion Uriel 'Yuca' Lopez (13-6,6KOs) sa main event sa Pinoy Pride 45 sa Nobiyembre 24 diha sa IEC Convention Center.

"Tan-aw nako kaya na ko moaway na sa mga sikat sa akong dibisyon, pero tuo sab ko nga kinahanglan pa ko og experience.

Andam ra man ko magpaabot hangtod nga mahimo ko nga world title challenger," matud pa ni Santisima atol sa press conferencekagahapon didto sa Summit Circle Cebu Hotel.

Si Santisima nga midaog sa katapusan niyang away batok ni Thai fighter Likit Chane niadtong Hunyo didto sa Maasin City, nangandaman sa  mas  lisud nga sangka uban ni Lopez.

Si ALA international matchmaker Edito Villamor miingon nga bisan dili maayo ang rekord ni Lopez, dili kini kakompiyansaan tungod kay kini ang WBC Latino super bantamweight champion. Si Lopez adunay tulo ka sunod-sunod nga daog diin ang katapusan mao ang second round knockout batok sa iyang kababayan nga si Antoni Garcia.