GDSM, Boss KTV mi-arangkada sa Alegado Cup

CEBU, Philippines — Ang GDSM Marketing ug Boss KTV mipakita kon unsa sila ka seryoso sa ilang kampanya sa titulo human gilabhan ang tagsa-tagsa nila ka mga kontra sa open division sa 8th Mayor Teresa 'Nene' P. Alegado Fiesta Basketball League diha sa Consolacion Sports Complex.

Si Russel Movera milansang og pito ka tres sa iyang 32 puntos sa dihang gipakaging sa GDSM Marketing ang All Friends, 110-96.

Ang igsoon ni Russel nga si Rexon Moneva miamot og 14 puntos samtang si kanhi University of the Visayas (UV) Baby Lancer JC Escalona mitali og 12 alang sa GDSM nga wala na molingi pa sukad miposte og 60-48 nga labaw sa halftime.

Misamot pa ang kainit sa GDSM aron pag-inat sa ilang bentaha ngadto na sa 87-70 padung ngadto sa katapusang hunat sa duwa.

Si Larry Malagar mihipos og 24 puntos alang sa All Friends, samtang si John Haniel Abinales dunay 22 puntos ug si Lemuel Malagar mi-iskor og 16 sa pilderong kawsa.

Sa laing duwa, si Randy Colonia mipabuto og 24 puntos sa dihang ang Boss KTV mipiog sa David Justine, 63-49.

Sila si Lemar Dahil ug Jerome Valle nagkumboya og 23 puntos alang sa Boss KTV, nga milusad og nagkayong opensiba sa final half aron pagpatikyaob sa David Justine.

Alkansi sa iskor nga 10-19 human sa unang kuwarter ug ingon man sa iskor nga 27-30 sa halftime, ang Boss KTV miresbak sa ikatulong kuwarter aron pag-ilog sa labaw, 46-43.

Padayong nagmangtas ang Boss KTV sa naghinapos nga bahin sa aksiyon aron paglubong sa David Justine og 14 puntos.

Si Joniel Maglasang maoy nangu sa David Justine uban ang 14 puntos, si Erwin Brigoli mikadlit og 12 ug si Joseph Cabahug mirehistro og 10 puntos sa pilderong kawsa.

Sa laing bahin, ang Nangka, Tolotolo ug Lanipga nakasagunson og duha ka daog aron angkonon ang sayong liderato sa tagsa-tagsa nila ka mga kategoriya.

Si Winston Pepito mipupo og 22 puntos sa dihang gilampaso sa Nangka ang Jugan sa SK Juniors Category A, si Jessie Bathan mikadlit og 26 puntos aron pangulohan ang Tolotolo ngadto sa 67-32 nga demolisyon sa Tilhaong sa SK Juniors Category B, si Junbrey Arcilla ug Ujellio Medillo nagkombinar og 32 puntos sa dihang gibuntog sa Lanipga ang Panas, 49-43, sa Inter-Barangay Seniors Category B, samtang si Jeco Alfanta mipatuasik og 29 puntos aron ituboy ang Tolotolo ngadto sa 71-53 nga pagkastigo sa Tilhaong sa Midgets Category B. (BANAT NEWS)