Age-groupers mosikad sa Consolacion caging

CEBU, Philippines – Duwa sa mga batang basketbolista gikan sa nagkadaiyang age-groups maoy mosikad  sa 8th Mayor Teresa 'Nene' P. Alegado Fiesta Basketball League karong Sabado diha sa Consolacion Sports Complex.

Ang mga duwa gikatag ngadto sa little mini open (13-under), mini open (15-under) ug midget open (18-under) category.

Dunay sa'y SK (21-under), inter-barangay seniors ug open division, apan ang ilang aksiyon magsugod karon pang Septiyembre 2 dungan sa opening ceremonies ning tulo ka bulan nga torneyo nga usa sa mga highlights sa tinuig nga kapistahan sa Consolacion, kansang  mahal nila nga patron    si San Narcisco karong Oktubre 29.

Dunay representante ang tanang 21 ka barangay sa Consolacion.

Ang mga partisipante gibahin sa duha ka brackets diin 13 ka teams ang naglangkob sa lower land ug walo sa upper land.

Ang sentro sa atraksiyon sa Mayor's Cup mao ang open category nga pagasalmotan og unom ngadto sa walo ka mga koponan, kansang  players rehistradong botante sa Consolacion.

Anaa na karon sa ikawalo niining edisyon, ang tinuig nga liga  gipaluyohan gihapon sa Consolacion LGU ubos sa liderato nilang Mayor Nene Alegado ug Vice Mayor Aurelio Damole.

Si Liga ng mga Barangay President Wesley Alimoren maoy sports committee chairman inabagan nilang SB members Marilou P. Casul, Victor Maglasang, Boy Tibon, Alfie Ouano ug SK Federation President Carlos Donn Flores nga maoy mga co-chairperson.

Ang mga duwa ubos sa superbisyon ni league Commissioner Paul Alelu Q. Flores nga nakaduwa uban ni PBA superstar Arwind 'Spiderman' Santos sa San Miguel Beermen atol sa ilang panahon sa UAAP sul-ot ang uniporme sa Far Eastern University (FEU) Tamaraws.