Micaela daog sa noah sa FYA Summer League

CEBU, Philippines – Mikulit sa ilang ikaduhang daog ang Micaela pinaagi sa pagpilde sa Noah, 114-108 sa nagpadayong FYA Summer League 2018 Season 21 basketball tournament niadtong Huwebes didto sa Vicente Sotto gym sa Punta Princesa, dakbayan sa Sugbo.

Si Ryan Villaver maoy nangu sa lima ka Micaela players nga miiskor og double figures  sa iyang 23 puntos, gisundan ni Toper Marata  nga adunay 17 puntos.

Laing miiskor og double digits  sa Micaela mao si Ranel Patalita nga miamot og 16 puntos, Noel Medalle nga mitikdol og 14 puntos ug si Niel Arias nga mikamada’g 13 puntos alang sa ilang 2-1 nga baraha.

Naglisud ang Micaela nilang Noel Medalle ug Edgar Noquillo sa sayong bahin sa duwa hinungdan nga gibiyaan sila og 11 puntos sa first quarter, 18-29.

Sa kombinasyon nilang Marata, Villaver ug Medalle, ang Micaela hinay-hinay nga mikitkit sa labaw hangtod nailog nila ang momentum. Ang tulo maoy miangkon sa 25 puntos nga nahipos sa Micaela sa tibuok second period. Si Marata miiskor og 11 puntos, samtang si Villaver mitimbre’g otso puntos ug sayes puntos gikan kang Medalle.

Miburot pa ang labaw sa Micaela ngadto sa 10 puntos, apan nahiyos kini ngadto na lang sa singko puntos. Gamay ra man tuod ang labaw sa Micaela, apan ila kining naprotektahan hangtod nahurot ang oras sa duwa.

Dako unta ang iskor ni Juvinille Enriquez, apan anugon lang kay napilde ang Noah.

Si Enriquez mipabuhagay og 31 puntos. Misalida sab si Balag Atuel nga mikamada og 20 puntos, samtang ang team manager nga si Jobert Barro ug Wendel Abella mitampo’g 16 ug 15 puntos sa Noah nga nalabay sa ikaupat nga dapit sa standing uban sa Angel Mary Pawnshop, CRV ug Soontit Construction sa managsama nilang 1-2   nga baraha.

Sa laing bahin, ang Harold’s Hotel ni Arnel Trinidad pabiling nagsolo sa liderato human midaog batok sa CRV ni Christian Villacastin, 102-98.

Ang Harold’s Hotel wala pa’y pilde sa upat ka duwa ning maong liga nga nahimo sa panagtambayayong sa mga opisyal sa FYA ubos sa liderato sa presidente niining si Dexter Caballero uban sa suporta ni Brgy. Capt. Boy Atillo.

PUNTOS MATAG USA

MICAELA (114) – Villaver 23, Marata 17, Patalita 16, N. Medalle 14, Arias 13, R. Tabares 4, E. 

Noquillo 4, D. Tabares 4, J. Noquillo 2, Abay 2.

NOAH (108) – Enriquez 31, Atuel 20, Barro 16, Abella 15, Dechosa 8, Baltonado 7, M. Garcia 6, G. 

Garcia 5.