Love nagmangtas sa Cavs

CEBU, Philippines - Si Kevin Love mipabuhagay og 34 puntos sa unang kuwarter nga maoy ikaduhang labing daku sa kasaysayan sa NBA aron pagtapos og season-high 40 puntos sa 137-125 nga kadaugan sa Cleveland Cavaliers batok sa Portland TrailBlazers kagahapon  adlawa didto sa Quicken Loans Arena sa Cleveland, Ohio.

Ang 28-anyos nga power forward miposa og walo ka tres sa unang kuwarter aron pagkulit og franchise record alang sa Cavs nga nagtangag na karon og baraha nga 11-2.

Si Klay Thompson sa Golden State Warriors maoy nagkupot sa rekord alang sa labing daku nga puntos sud sa usa ka kuwarter human kini mipatuasik og 37 puntos sa ikatulong kuwarter atol sa ilang duwa batok sa Sacramento Kings duha ka tuig ang milabay.Matabla unta ni Love ang maong rekord, apan nasipyat siya sa iyang 3-pointer sa nahabiling 75 segundos sa unang bahin sa duwa.

Miabag ni Love si LeBron James nga miayag og 31 puntos, 13 ka assists ug 10 ka rebounds alang sa ika-44 niining triple-double sa iyang career.

Sama ni Love, nanginit sab si New Orleans forward Anthony Davis nga mitali og club-record nga 21 puntos sa unang kuwarter. Sa kinatibuk-an, mitapos siya og 45 puntos ug 10 ka rebounds sa dihang  gikuninitan sa Pelicans  ang Minnesota Timberwolves, 117-96 alang sa ikaupat nilang sunod-sunod nga daog.

Si Austin Rivers dunay 22 puntos sa dihang gilubong sa Los Angeles Clippers ang Dallas Mavericks, 124-104 aron  sa padayon nilang pagdominar sa liderato bitbit ang 14-2 nga baraha.

Si Kawhi Leonard mibubo og 30 puntos sa dihang gibihag sa San Antonio Spurs ang  Charlotte Hornets, 119-114, samtang si Dwight Howard mitali og 23 puntos ug 20 ka rebounds sa dihang gidagit sa Atlanta Hawks ang Indiana Pacers sa iskor nga 96-85.

Wala sab magpabitin sila si Stephen Curry ug Kevin Durant nga nagkumboya’g 61 puntos alang sa Golden State Warriors nga mikuso-kuso sa Los Angeles Lakers, 149-106, samtang si DeMarcus Cousins mipabuto og 36 puntos aron pangulohan ang Sacramento Kings batok sa Oklahoma City Thunder, 116-101. (BANAT NEWS)