Monterroyo-Jordan, AC Troopers kulit na sab og daog sa laba President’s Cup

CEBU, Philippines - Milusad  og balanseng opensiba ang AC Troopers nga maoy bugtong nilang taktika pagtipi sa AFN Realtor, 80-74 sa Los Amigos Basketball Association (LABA) President’s Cup 2016 Second Conference niadtong Biyernes didto sa Barangay Banilad gym sa dakbayan sa Mandaue.

Si Joel Cabahug mao lang ang nakaiskor og double digits sa AC Troopers ni P/Insp. Dondon Coloscos nga mirakrak og 11 puntos, ang nakaayo lang kay ang tanan niyang kaubanan nagtampuhay og mga puntos aron maangkon ang ilang ikaduhang sunod-sunod nga daog  batok ang usa ka pilde.

Kulba unta kaayong  nakaduwa  si AFN Realtor team owner Arnold  Pestaño diin miiskor kini og 23 puntos, apan anugon lang kaayo ang iyang mga paningkamot kay ang   koponan niya nasugamak na sab sa ikaupat nga higayon.

Sila si Dodoy Dawal ug Ely Tantuan mitampo’g 14 ug 12 puntos alang sa AFN Realtor nga bokya pa sa upat nila  ka duwa.

Ang AC Troopers labaw og 10 puntos  paghuman sa third quarter, 62-52. Nahilis ang labaw human si Pestaño miugbok sa ikatulo niyang 3-pointer, 69-68, apan gisuklian sab kini dayon og tres ni  Edgar Beldera aron ilogon og balik ang labaw ug wala na sila molingi pa hangtod nahurot ang oras.

Sa pasiunang duwa, ang Monterroyo-Jordan team mipaluhod sa Luke Genesis, 88-80 pinangulohan  sa higante nilang  sentro nga si Michael Tañan nga miugkat og 23 puntos. Sila si Jordan ug Marlon Mendoza  nagkuridas og 14 puntos.

Nagsinukliay og mga puntos ang duha ka koponan sa nag-unang tulo ka kuwarter ug didto na   midistansiya ang Monterroyo-Jordan sa nahabiling bahin sa third period.

Aron pagseguro sa ilang kadaugan, si Monterroyo mao na’y midala sa dakung papel isip ‘playmaker’  aron mapahiluna ang duwa.

Mikawat sab og salida sila si  Pacencia,  Domingo Caballero ug Florentino Ecot, kansang duha ka tres nakabingat sa ilang labaw atol sa fourth quarter.

Ubos sa pagtugot ni LABA president  Gilbert Sebandal, ang liga gidumala ni league commissioner Albert Ramos inabagan nilang Lloyd Chavez ug Willy Medillo, ingon man nilang Louie Canen, Vanjan Naya, Ruben Canen ug James Colis.

Puntos matag usa

Unang duwa:

MONTERROYO-JORDAN (88) – Tañan 23, Mendoza 14, Jordan 14, Pacencia 7, Caballero 7, Ecot 7, Hatamosa 4, Cabucos 3, Monterroyo 2.

LUKE GENESIS (80) – Lawas 20, Suson 16, Landiza 6, V. Herbieto 6, Acusar 5, Jacalan 4, Tungal 4, Barba 3, T. Herbieto 3, Alcontin 2, Lara 1.

Ikaduhang duwa:

AC TROOPERS (80) -  Cabahug 11, Velasco 8, Dakay 8, Englis 7, Yares 7,  Monsanto 7, Beldera 7, Jacalan 6, Saldua 4, Coloscos 4, Surban 4, Ferolino 4, Comiso 3.

AFN REALTOR (74) – A. Pestaño 23, Dawal 14, Tantuan 12, Mingane 8, Recto 8, Ygoña 4, Aton 4, Rusiana 1. (BANAT NEWS)