TNT Ka Tropa batok Alaska
CEBU, Philippines - Pakigsawo sa liderato maoy tuyo sa TNT Ka Tropa sa dihang ilang harungon ang Alaska Aces sa PBA Governors’ Cup karong adlawa didto sa Ynares Center.
Ang TNT nga mosuway pagsakmit sa 3-0 moharong sa Alaska sa alas-7 sa gabii, human sa duwa tali sa Blackwater Elite ug Rain or Shine Elasto Painters nga sugdan sa alas-4:15 sa hapon.
Ang TNT lab-as pa sa ilang come-from-behind nga kadaugan batok sa Rain or Shine sa miaging Miyerkules diin nagmangtas ang duha nila ka import nga silang Mario Little ug Michael Madanly.
Pabor nga modaog ang KaTropa karon tungod kay wala ang sinaligang ace player sa Aces nga si Calvin Abueva, kinsa moserbisyo sa iyang usa ka duwa nga suspensiyon nga gisilot kaniya sa PBA dihang gisiko niya ang nawong ni Chris Ellis sa Ginebra sa miagi nilang duwa.
Tungod niini, kinahanglan nga doblehon ni import LeDontae Henson ang iyang paningkamot sa tuyo nga mahatagan ang Alaska og 2-1 nga baraha. (BANAT NEWS)
- Latest