Lumba sa baroto karong sabado
CEBU, Philippines - Sa ikaduhang sunod-sunod nga tuig, usa ka lumba sa baroto diin magtige ang pipila ka Sugbuanong mananagat ang modugang og kasadya sa Sinulog festival.
Giulohan og ‘Sinulog 2016 Balik Baroto Regatta’, ang talagsaon nga kompetisyon sugdan human sa fluvial procession sa milagrosong Señor Sto. Niño karong Sabado. Magsugod ug matapos kini diha sa lapyahan sa Baywalk duol sa Cebu City Senior Citizen’s Park.
Nagpasiugda sa maong kalihukan mao ang Balik Baroto Movement ni kanhi Customs District collector David ‘Kuya Boy’ S. Odilao, Jr. inabagan sa Bisdak Group (Hugpong sa mga Bisaya alang sa Kauswagan ug Kaangayan, Inc.), diin siya sab maoy founding chairman, ingon man sa kagamhanan sa dakbayan sa Sugbo, Sinulog Foundation ug Cebu Holdings, Inc.
Gisuportaan sab kini nilang Mayor Democrito ‘Aljun’ Diamante, Jr. sa Tuburan, ang presidente sa League of Municipalities in the Philippines-Cebu Chapter, Butch Sepulveda sa Borbon ug Edsel Galeos sa Argao.
“Akong giawhag ang tanan sa pagsuporta ning atong kalihukan kay sa gikaingon ko na, sa karaan pa, baroto ug layag ra ta,” matud pa ni Odilao, ang Amahan sa Sinulog gumikan kay siya man maoy nagsugod sa giila na karong inahan sa tanang festivals sa nasud niadtong Enero 17, 1980.
Nagkanayon si Odilao nga duna na’y 33 ka mga entrante gikan sa Talisay, Borbon, Tuburan ug Argao ang kompirmadong mosalmot sa kulbahinam nga karera diin dunay gitagana nga ganti nga kapin sa P200,000. Ang makampiyon mobulsa og P50,000, samtang ang mopahiluna sa ikaduha hangtod sa ikaupat nga dapit modawat og P40,000, P30,000, P20,000 ug P10,000. Ang malandig sa ikalima hangtod sa ika-10 dunay makuha nga P5,000 matag usa, samtang ang tanang finishers makaangkon og P2,000.
Midugang si Odilao nga ilakip nila sa ilang aktibidades ang photo contest. Ang grand winner modawat og P20,000, samtang ang second hangtod sa 5th mobulsa og P15,000, P10,000, P5,000 ug P3,000. Kadto lang hinuon ang mga hulagway nga napatik sa mga mantalaan ang kuwalipikado. (BANAT NEWS)
- Latest
