Grizzlies nabihag sa Hawks
CEBU, Philippines - Nakadagit na sab og daog ang Atlanta Hawks ubos sa pagpangulo ni Jeff Teague human nila gibihag ang Memphis Grizzlies, 96-86 sa duwa nila sa NBA kagahapon didto sa Philips Arena sa Atlanta, Georgia.
Si Teague mitusik og 25 puntos alang sa Hawks, kinsa miiskor sa ikaunom nilang sunod-sunod nga daog. Padayon sab ang ilang pagpukan sa mga kontra nila gikan sa Western Conference.
Ang Hawks mihimo na’g nine-game winning run batok sa teams sa West. Midaog na sab sila og 20 sud sa 22 ka duwa aron maangkon ang best record sa Eastern Conference.
Si Teague maoy nangu sa pagkontrolar sa duwa dihang mihimo’g 10-0 run ang Hawks aron tablahon ang iskor sa 84-all.
Si Al Horford, kinsa miamot og 12 puntos, maoy miduslit sa ilang rally pinaagi sa iyang jumpshot ug gisundan dayon sa baskets nilang Teague ug Kyle Korver alang sa ilang 94-84 nga abante. Sila si Korver ug Pero Antic mihimo sab og double figures nga adunay 14 ug 13 puntos matag usa.
Ang Memphis gipangulohan sab ni Mike Conley pinaagi sa iyang 17 puntos, samtang si Marc Gasol miamot og 16 puntos.
Sa lain pang mga duwa, ang Houston Rockets milubong sa Cleveland Cavaliers, 105-93, gilubong sab sa Milwaukee Bucks ang Philadelphia Sixers, 97-77. Ang Utah Jazz miiskor sab og 97-77 nga kadaugan batok sa Chicago Bulls, ang Washington Wizard mipilde sa New York Knicks, 101-91.
Midaog sab ang Charlotte Hornets batok sa New Orleans Pelicans, 98-94, ang Boston Celtics miiskor og daog batok sa Brooklyn Nets, 89-81. Gipilde sa Detroit Pistons ang Dallas Mavericks, 108-95. Nakaipsot ang Denver Nuggets batok sa Orlando Magic, 93-90.
Ang Phoenix Suns mipakaging sa Minnesota Timberwolves, 113-111, ang Sacramento Kings milubong sa Oklahoma City Thunder, 104-83, ang Golden State Warriors mipukan sa Indiana Pacers, 117-102 ug ang Los Angeles Clippers milubong sa ilang silingang L.A. Lakers, 114-89. (BANAT PALARO)
- Latest
