Valisado nakabawos ni Soquite
CEBU, Philippines - Pambato sa Unified MMA nga si Rodel ‘Pitbull’ Valisado midaog pinaagi sa third round rear naked choke batok ni Junrey ‘Botong’ Soquite sa ‘Bakbakan sa Sugbu’ kagahapon didto sa Cebu City Sports Institute sa Brgy. Sawang, Cebu City.
Ang ‘Bakbakan sa Sugbu’ maoy labing unang combat sports grassroots program sa Cebu City Sports Commission (CCSC) nga naglakip sa MMA, boxing, arnis ug karatedo.
Mahulog kini nga panimalos ni Valisado human siya nakatilaw og pilde gikan ni Soquite duha ka semana ang milabay sa Cebu Extreme Fight League didto sa Cebu Coliseum.
Ning higayona, giseguro ni Valisado nga dili na makabuhi pa si Soquite, kinsa iyang natuok sa nahabiling tres segundos sa duwa.
Sa supporting main event, gikulata ni Jed ‘Buhawi’ Alvarez sa Yaw-Yan Simaron MMA si Jayde ‘Spark’ Dantes sa Arcomjukai KBC sa 2:15 sa first round.
Lain pang nidaog mao sila si John Edu ‘Excalibur’ Torbiso sa Durex Dragon KBC, Dexter Bareguard sa MFS MMA, Dodong Jagape sa Red Dragon MMA ug Nicko Suerte sa Yaw-Yan ArDigma.
Sa iyang bahin, si CCSC chairman Edward Hayco nalipay sa kalampusan sa maong kalihukan. Plano niya nga iyang himuon kada semana ang maong event. (BANAT NEWS)
- Latest
