Dodod Colina topscorer na sab sa White sa SRP Sunday Club

CEBU, Philippines -  Wala pa gihapoy nakabuling sa rekord sa White team human kini miugkat sa ikaupat nilang sunod-sunod nga daog pinaagi sa

paglubong sa Red team, 89-75 sa nagkainit nga aksiyon sa SRP Sunday Club Christmas League 2013 basketball tournament kagahapon

didto sa San Roque Parish gym sa Brgy. Subangdaku, Mandaue City.

 Sa gilauman, si Glen 'Dodod' Colina nga magsaulog sa iyang adlaw'ng natawhan karong Nobiyembre 22, mao gihapon ang

kinadak-ag iskor sa White team nga mikandos og 21 puntos, diin 12 niini iyang nahimo sa first period.   Mihimo sab og

double figures si Alex Cabase  sa iyang 20 puntos alang sa White nga walay kukaluoy nga milubong sa Red sa halftime, 52-38.

 Imbes maluya sa kalawom nga lubong, ang Red team ubos sa giya nilang Ruben Flores ug Roldan Baloro wala kawad-ig

paglaum ug  padayon kining nakigbisog hangtod nga  nakan-an ang labaw ngadto na lang sa kuwatro puntos, 54-58 sa nahabiling 3:28 sa

third period.

 Alisto sab hinuon nga nakarekober ang White ug  milusad kini'g 6-0 run aron inaton pagbalik ang labaw ngadto sa 11 puntos,

69-58  human sa  buzzer-beating three-point shot ni Ohing Ortiz.

 Milugak ang depensa sa White sa tunga-tungang bahin sa final quarter hinungdan nakahigayon ang Red team  pagpapas sa

double digit nga biya sa giya nilang Flores ug Nido Mercader.

 Gisuklian sab dayon kini ni Colina sa iyang pito ka sunod-sunod nga puntos, lakip na ang  acrobat shot aron hatagan ang White

team og 77-64 nga bentaha.

 Sa tuyo nga dili malamaan ang ilang limpyong baraha, ang White team wala na mohatag sa Red team og higayon nga

makagukod.

 Ang ikatulong three-point shot ni Ortiz maoy mikandado sa kadaugan sa White team.

 Ang Red team gipangulohan sab ni Glenn 'Colins' Colina, kinsa miiskor og 21 puntos. Si Mercader mitimbre og 16 puntos ug

Flores mitikdol og 10 puntos alang sa Red nga wala pa gyud makadaog sa upat nila ka duwa.

 Sa laing aksiyon, ang Blue nakarekober sab dayon human maka-eskapo batok sa Gray team sa iskor nga 94-91.

 Gipangulohan gihapon ni Ramon Fontanosa pinaagi sa iyang 20 puntos, lakip na ang tulo ka 3-pointers, gisundan ni Arnel

Colanse nga miamot og 15 puntos ug Dante Orendain nga adunay 13 puntos.

 Si Badilles mirehistro og game-high 41 puntos aron pangulohan ang pilderong Gray. Silang Eric Obra, Runcan ug Renato

Conahap miiskor sab og double figures alang sa Gray team.

 Ang Blue nagbitbit na karon  og 2-2 nga baraha, samtang ang Gray adunay 1-3 win-loss record.

Ang SRP  Sunday Club gidumala sa ilang presidente nga si Rom Castañeda.

 Natukod kini niadtong tuig 2008 ubos sa ilang founder nga si  Engr.  Lito Florentino uban nilang   Dr.  Bernard  Mansueto, Joy

Miñoza, Ricric Fontanosa, Dante  Orejudos  ug  Joel      Dublin.

 Gisuportahan sab kini ni Rev. Fr. Rolyn E. Vics, CM, ang parish priest sa San  Roque Parish ug Rev. Fr. Jovencio Rendon,

coordinator sa Sunday Club.

 Ang mga duwa gidumala ni league commissioner Monching Menaling sa abag nilang Juvenal Perolino, Van-Van Amora, Zaldo

Montayre, Paul Miñoza ug Pedro Montayre.

 Gawas ni Castañeda, lain pang mga opisyales sa SRP Sunday Club ning tuiga naglakip nilang  Jun Atillo  (vice president),

Ruben  Flores  (secretary), Glenn Castañeda (treasurer), Arnold Aventajado  (auditor)  ug   Nonoy Amora   ug  Melio   Colina    (PROs).

 Ang tinuig nga liga gisuportahan sab  ni  Subangdaku Brgy. Capt. Ernie Manatad ug councilor Amay Dy.

puntos matag usa

Unang duwa:

 BLUE (94) - Fontanosa 20, Colanse 15, Orendain 13, Anghay 9, Alesna 6, Labares 4, Povadora 4, Enriquez 4, Gonzaga 3

 GRAY (91) - Badilles 41, Obra 19, Runcan 13, Conahap 10, Survilla 4, Menaling 4, Rodriguez 4, Cardinas 2, Ceniza 2

Ikaduhang duwa:

 WHITE (89) - Colina 21, Cabase 20, Ortiz 9, Sagayno 6, Ompad 6, Grafe 5, Cabcaban 4, Obenza 3, Adrian 2,  Zabate 2

 RED (75) - Colina 21, Mercader 16, Flores 10, Hesalta 6, Baloro 6, Cabunilas 5, Dialogo 5, Labastida 2 (BANAT NEWS)