24/7 nga serbisyo

Usa sa gipaabot nga dakong kausaban sa kagamhanan sa dakbayan sa Sugbo sugod Hulyo 1, gawas sa paglingkod na sa bag-ong mga napiling opisyal, mao ang talagsaon nga idiya sa pagpangalagad sa katawhan ubos sa liderato nilang Mayor-elect Nestor Archival ug Bise Mayor Tomas Osmeña.

Tinguha nilang duha nga ablihan ang City Hall alang sa way putol nga serbisyo 24-oras lakip na sa adlaw’ng Sabado ug Domingo. Ang idiya alang sa 24/7 nga operasyon sa City Hall giduso ni Osmeña panahon sa kampanya atol sa bag-o lang nahuman nga midterm elections.

Tumong ni Osmeña nga kaserbisyohan ang mga Sugboanon nga panahon lang ssa gabii sila makalugar tungod kay dunay trabaho sa adlaw. Idiya ni Osmeña nga magbutang og “night mayor” ang City Hall nga maoy motubag sa tanang panginahanglan atol sa kagabhion.

Ilang tinguha nga sugdan ang maong talagsaong paagi sa pagpanerbisyo dinhi sa Syudad. Sa higayon nga hingpit na kining mapatuman dinhi sa dakbayan, plano nilang moduso og petisyon ngadto sa mga nasudnong buhatan sa gobyerno nga himuon ang samang sistema.

Nindot ang maong idiya, mahulagway nga talagsaon apan dako ni og mahimo aron mapalambo pa ang serbisyo sa syudad. Kun hingpit ning mapatuman, duha ka shift na unya ang trabaho sa dakbayan. Dunay mga trabahante sa adlaw ug duna poy motrabaho panahon sa gabii.

Wala pa ni sukad mahimo dinhi sa nasud ug tingali ang Sugbo maoy bugtong local government unit nga mohimo niini sa tibuok nasud.

Saludo ko sa ka “innovative” ni Osmeña. Ang lider nga sama niya maoy gikinahanglan sa syudad. Apan hinaot magpabilin siya sa iyang lugar ug di modominar sa bag-ong mayor.

Si Archival pa gihapon ang mayor ug angayang hatagan siya sa igong gahom unsaon niya pagpadagan ang syudad.

Hinaot nga di masubli nilang Archival ang gidangatan sa kanhi mga alyado ni Osmeña nga silang kanhi mayor Alvin Garcia ug Michael Rama nga nisampot sa panagkontra ug panagribal gyud sa politika.