Mora'g kendi nga 'nips'

Karon nga nahuman na ang eleksiyon, dili na kuno ilhon ni Presidente Marcos, Jr. ang bulok politika sa mga mananaug sa 2025 elections ug nga kinahanglan maghugpong ang tanan alang sa hiniusang tumong.  Bisan ni’ng panawagan sa kahiusahan, magpabilin nga adunay dapigan nga partido ang mga politiko.  Dili usab maayo nga walay pundok nga mosaway kon ugaling adunay mga abuso sa administrasyon.  Matud pa sa akong amigo, “Mahimong magkahiusa kunohay ang mga politiko apan sama sa kendi nga “Nips,” nagkalain-lain gihapon ang bulok sulod sa putos niini.”  Muleeng!

Pilde kon walay “uwan-uwan”

Mipagawas ang Asian Network for Free Elections (ANFREL) sa ilang report kabahin sa ilang obserbasyon sa 2025 midterm elections diin gitumbok nila nga makapahingawa ang kuyanap nga vote buying ug pag-abuso sa resources sa kagamhanan.  Igo ra nga nagbutyag ang ANFREL  sa mga butang nga dugay na’ng nahibaw-an ug gipamuhat sa panahon sa eleksyo diin walay mahimo ang COMELEC kabahin niini.  Kabahin na kini sa kultura sa mga botante’ng Pinoy kay matud pa, “Kon walay “uwan-uwan” alang sa umahan nga gikan sa politiko, dili usab siya mahatagan og bunga sa umahan gikan sa katawhan.”  Fezteleern!

Nangalyas lang

Gipahibawo ni Comelec Chair George Garcia nga kadto’ng mga party-list nga adunay pangalan nga susama sa mga termino sama sa “ayuda” o ba kaha, “teleserye”, dili na tugtan nga morehistro sa umaabot nga mga eleksiyon.  Kinahanglan nga ilisan sa party-list ang ilang ngalan subay sa ilang mga prinsipyo ug plataporma.  Bantayanan ang pag-ilis sa mga ngalan sa party-list kay basin susama ra ug dili kini halayo sa naha-una nilang ngalan.  Makapahinumdum sa akong amigo nga miingon nga wala nang-alyas siya pag-adto niya sa laing barrio.  Inay motug-an sya nga “Titing” ang iyang pangalan, miingon siya nga “Totong” kuno ang iyang pangalan.  Pagkatoytoy!

Segurista ang mga campaign donors

Alang kang Senador Kiko Pangilinan, ang mga gipahigayon nga mga survey nga mipakita og “snapshots” sa kandidato nga nagustohan sa mga botante, naghatag hinuon og kalisod sa mga kandidato nga makapangita og pundo alang sa ilang kandidatura kay “segurista” man lage ang mga campaign donors. Tungod niini, adunay mga kandidato nga mobayad alang sa pagpahigayon og survey nga mopabor kaniya.  Kay matud pa bitaw, “Kon ang atong eleksyon gi-base pa sa popularidad lamang ug dili sa kwarta, piho nga modaug ang mga mascot nga si “Jollibee” ug “McDonald” sa eleksyon.”  Atala lagee!

Utangan pa

Miluwat ang Court of Appeals og 60-day Temporary Restraining Order (TRO) nga nagpakgang sa Office of the Ombudsman sa pagpatuman sa unom ka buwan nga preventive suspension batok kang Governor Gwendolyn Garcia.  Tungod kay napilde na man si Governor Garcia sa miaging piniliay, maingon nato nga ang TRO igo lang naghatag sa gobernadora og katungod nga mopadayon sa paglingkod sa nahibiling adlaw sa iyang termino.  Komento pa sa usa ka Facebook user, “Unom ka buwan ang suspension sa gobernadora, busa bisan pa sa TRO, tungod kay pilde na man, utangan pa gani og upat ka bulan ang gobernadora.”  Madahaan!