EDITORYAL — Adlaw karon sa paghukom

Adlaw na karon sa paghukom. Adlaw nga diin bisan ang ordinaryong Pilipino, kabus man o adunahan, karong adlawa maoy pinaka-gamhanan tungod kay literal nga naa ra sa tumoy sa ilang lapis ang kaugmaon aning mga politikong nanagan.

Hinuon, dili ikalimod nga daghan sa mga kandidato ang namalit og boto. Sobre nga gipasupotan og listahan sa mga pangalan sa politiko ug ang kwarta.

Nahimo na kining kultura dinhi sa Pilipinas matag eleksyon, busa lisod na kining mawagtang pa tungod kay dunay mga tawong gapaabot gyud ani matag panahon sa eleksyon.

Sa mga mobotar karon, hunahunaon unta nila inabagan sa ilang konsensiya kun angayan bang botaran kining mga nipalit sa ilang boto.

Dili unta mobotar tungod lang kay nadala sila sa panon, dili sab unta rason nganong dili botaran ang usa ka kandidato kay naglagot ka sa ilang partido o sa ilang grupo tungod kay maoy sulti sa uban bisan wala ka kasabot sa isyu ug sa mga rason.

Susihon kun kining botaran aduna na bay agi, unsay ilang agi sa dihang kaniadto naglingkod sa posisyon, kun daghan ba sila og natabangan ug wala ba sila nangurakot samtang sila naa sa gahum, wala ba silay mga isyu.

Ug labaw sa tanan, ilabi na sa mga senador ug kongresista, tan-awon kun unsa ilang plataporma, kun unsa ilang kayang buhaton .

Botaran kadtong dunay kahadlok sa Ginoo, makatarunganon ug may pagtahod sa balaod ug hustisya, may respeto sa kinabuhi, dili kawatan, dili traydor ug ang interes gyud sa Pilipinas ug sa tanang Pilipino maoy sentro sa ilang mga plataporma.

Angayan ba silang saligan og gahum, nga karon palang gani nangurakot na sa ilang boto pinaagi sa pag-abusar sa kapobrehon sa mga botante nga sa ilang tan-aw lawgan ra og pila ka piso, maila na ang ilang boto.