EDITORYAL  - Lokal nga kampanya

Duha ka adlaw nalang magsugod ang kampanya para sa mga lokal nga mga kandidato alang sa umaabot nga eleksyon Mayo 12 ning tuiga.

Makapaabot ang mga tawo og wala’g-tuo nga mga kampanya sama sa campaign rallies, pulong-pulong diha sa mga barangay, personal nga pagbisita sa mga kandidato.

Magbalay-balay sab ang mga kandidato aron magpaila-ila sa ilang kaugalingon, manghatag og flyers, ballers, t-shirts ug uban pa para magpahibalo nga sila mikandidato sa umaabot nga eleksyon.

Bisan mga suok-suok, bisan lapukon, bisan duna pay iro nga manggukod, sum-okon gyud kini sa mga kandidato karong panahona para makighimamat sa mga botante.

Sa mga bag-ong mokandidato palang, makasabot ra ang mga tawo nga wala pa kini sukad makasuroy sa ilang mga lugar ug karon pa tingali mahitabo.

Apan sa mga magpa-reelect o magpasubli sa ilang posisyon karon, unya karon palang gyud makasum-ok og balik sa mga sudlonong bahin sa mga barangay,  makapangyam-id gyud ang mga botante.

Sa sulod tulo ka tuig silang nilingkod karon pa man nabalik og sum-ok sa ilang lugar kay eleksyon napud? Dili ba makauwaw?      

Karon nalang sab sila magpakita og linawas nga pakighimamat sa mga botante kay eleksyon naman pud, nganong sa nakalabay nga mga panahong naglingkod sila wala man makahinumdom og balik sa ilang mga lugar.

Maayo lang unta kun bisan tuod og wala makabalik aning mga suok nga lugar, dunay daghang nahimo samtang naglingkod maong na-busy. Pero kadtong uban nga wala gyuy nabuhat, mauwaw kaha sila mobalik og hangyo sa mga tawo?