EDITORYAL - Porn sites sayon ma-access sa mga bata

Usa ka konsehal sa Cebu City ang nipatingog sa bagtingan kabahin aning makaalarmang mga insidente sa pagbinastos ngadto sa kababayen-an dili lang sa mga hamtong kondili apil sab ang mga menor de edad mihimo na niini.

Hain naman diay ang mga gipangtudlo sa mga ginikanan sa ilang mga anak nga tahuron ang kababayen-an sama sa pagtahod sa ilang inahan? Sa mga eskuylahan, gitudlo pa ba kaha kini karon?

Siguradong gitudlo kini apan dili kaayo dulot sa hunahuna ug alimpatakan sa mga bata. Sa panimalay, matudloan lang ang mga bata kun nakasala na, ayha pa sila maymayan unsay husto ug unsay dili.

Sa mga eskuylahan gitudlo sab kini sa mga magtutudlo, apan sa gihapon, matanom lang sa hunahuna sa mga bata kun nakasab-an na sila kay nakasala na.

Dili na pro-active ang pamaagi karon sa pagtudlo kanila aning mga butanga tungod sa kadaghan sa angayan pa nilang makat-onan nga sa tan-aw sa mga nagtudlo kinahanglan sa mga bata.

Nakalimot na nga bisan kining mga ginagmay nga leksyon o pagtulon-an sama sa maayong pamatasan, dako og epekto sa pagkatawo sa mga bata sa ilang pagtubo.

Pun-an pa aning modernong mga gadgets nga dunay access sa internet nga iya sa mga bata. Pirme na silang makatan-aw og mga contents nga dili pa sila kaayo makasabot, apan kay gibuhat sa mga dagko, sa ilang tan-aw husto.

Apil ani kining mga pornographic sites gamit lang ilang mga cellphone gadgets ug kanang mga internet cafes, or PISO wi-fi  nga wala mo-block aning mga law-ay nga sites.

Dili tanang dunay cellphone makamaong mo-block og websites sa ilang gadget, apil niini ang mga ginikanan nga kalipay ra sa ilang mga anak ilang gihunahuna pinaagi sa paghatag og gadgets unya wa tan-awa unsay ginatan-aw sa ilang mga anak.

Si Konsehal Pastor Jun Alcover niawhag sa kapolisan nga tabangan ang siyudad pagpahunong ani.

Apan dili man tingali ang mga polis ani, kondili ang mga telcos ug sila diha sa lokal nga kagamhanan maoy angay nga unang mangusog ani pinaagi sa pagpasar og mga ordinansa nga magmando sa pag block ani nga websites dinhi sa siyudad.