Nakakat-on na kaha ta?

Niadtong Hulyo sa miaging tuig namantala sa pamantalaan nga moabot sa 32 porsiyento sa tubig sa Metro Cebu Water District (MCWD) ang nausik matag adlaw hinungdan nga ang nahisgutang water utility nawagtangan usab og kita nga moabot ngadto sa 2.4 milyones ka pesos matag adlaw.

Si Minerva Gerodias, tigpamaba sa MCWD, miingon nga ang katumbas sa maong kantidad nga nawagtang moabot ngadto sa 86,000 cubic metriko nga tubig nga nagrepresentar sa 31.8 porsiyento sa supply sa tubig matag adlaw. Ang MCWD nagkuha kini og 270,000 cubic metriko nga tubig sa tanan nilang kuhaanan. Apan mas ubos kini sa 560,000 cubic metriko nga gikinahanglan nga tubig sa mga dapit nga ilang gi-supplyan og tubig sama sa dakbayan sa Talisay, Sugbo, Mandaue, Lapu-Lapu, Lungsod sa Cordova, Consolacion, Liloan ug Compostela.

Karon nagnihit na ang tubig tungod sa kainit sa panahon. Kay nagnihit na ang tubig daghan na ang mitiyabaw. Daghan na ang nagreklamo tungod kay hinay na kaayo ang agas sa tubig samtang ang uban nga dapit wala na gayuy agas.

Karon nga nagnihit ang tubig, wa kahay tubig nga nausik samtang nagpaingon kini sa kabalayan gikan sa iyang tinubdan?

Sa mga panahon nga wala pa ang ting init natapakan na kaha sa MCWD ang mga buslot nilang tubo nga maoy hinungdan sa pagkausik sa ilang tubig?

Ang walay pagpakabana sa pagkamahinungdanon sa tubig sa dihang abunda pa ang tubig, nagpakabana na kaha sila karon nga nagnihit na ang tubig? Nakat-on na kaha ta sa pagkamahinungdanon sa tubig?

Kining kanihit sa tubig nato karon, makapahinumdom kanako sa sulti sa akong lolo kaniadto diin iyang giingon nga ayaw usiki ang tubig kay basin moabot ang panahon nga magpalit ka na og tubig.

Karon natinuod gyud ang giingon sa akong lolo. Kun kanidto libre ra ang tubig, karon ang tubig ato nang paliton.

Hinaut nga ang pagnihit sa tubig karon, nakapakat-on unta nato sa pag amping sa tubig.