Nahubsan nga sapa

Ambot kon motuo ba kaha mo nga dinhi sa Cebu City, dunay gihimong dakong sapa ang kagamhanan apan wa na gyu’y tubig nga moagi niini, bisan pa gani og dunay bagyo.

Dili mo motuo no? Bitaw, tinuod ni nga ang sapa nga gigastohan sa Department of Public Works and Highways (DPWH) diha sa Barangay Tinago, wa na gyuy tubig nga moagi.

Ang sapa nga gikan sa Lahug ug anaa mag-agi sa Barangay T. Padilla lahus na sa Barangay Tejero ug ngadto na sa Pier 3, halos nagtupad kini sa sapa nga gikan sa White Gold.

Kining sapa nga gikan sa White Gold, sumpay ni sa sapa nga gikan sa Barangay Carreta ug Hipodromo, pero ang tubig gipatipas man sa DPWH paingon sa Lahing-Lahing Creek sa Mabolo.

Gani, ang sapa nga agianan unta sa tubig kaniadto diha sa Barangay Carreta, gipahimuslan dayon sa mga tawo ug gipangtukoran na og kabalayan.

Ang nahibilin diha sa Barangay Carreta, maguwang na lang sa kanal ug gani halos wa nay makabantay nga may sapa diay nga milagbas sa General Maxilom Avenue Extension paingon sa simbahan sa Blessed Sacrament likud sa White Gold.

Kilid sa Blessed Sacrament, lapad kaayo ang gihimong sapa sa DPWH, pero hinay na ang tubig ug ang sapa anaa kini moagi kilid sa Barangay Hall sa Tejero.

Mao ning sapaa nga milagbas sa kanhi McArthur Boulevard nga karon gitawag na og Serging Osmeña Avenue, ug paingon na sa Pier 4.

Ang DPWH naglisud na pagpadako sa karaang sapa kay natabonan na man kini sa pantalan, dapit sa “Pier 4” mao nga naghimo na lang sila og “By-Pass River” aron ang tubig sa Tejero Creek nga gikan sa White Gold, moipon ngadto sa Lahug River nga anaa mag-agi sa Tinago.

Apan kay hinay na lagi kaayo ang tubig nga gikan sa White Gold kay gipatipas na man ngadto sa Lahing-Lahing Creek ang tubig nga gikan sa likud sa menteryo sa Carreta ug sa Hipodromo, aw dili na mobul-og ang tubig diha sa sapa sa Tejero.

Mao kini ang rason kon ngano nga ang “By-Pass-River” nga gihimo sa DPWH wa na gyud maagii pa og tubig, ug gipangutana nako si Mayor Michael Rama kon unsay paagi nga kapuslan ni sa laing kagamitan.

Kay lapad man kaayo ang maong gihimo sapa sa DPWH, pwede kini gamiton nga public plaza, ug tukoran ba og building nga kapahimuslan sa publiko.

Tan-aw nako, wa na gyud kini kinahanglana pa, kay ang tubig gikan sa White Gold, pwede ra kaayo nga molusot sa gamay’ng lungag nga nag-agi ilawom sa Pier 4.