Ingon niini diay

May ideya na ko aron maiban-ibanan ang problema sa traffic gikan sa Talisay paingon na ngadto sa lungsod sa Carcar.

Gani, ako gyud kini nga nasuwayan ug napamatud-an nga epektibo kaayo. Sirit ra gyud ang imong biyahe ug makatabang ka pa pagsulbad sa traffic.

Mangutana mo og unsaon man? Dia ra... Kamong dunay katuyoan nga moadto sa mga dapit sa probinsya, o kaha gikan mo sa probinsya ug mobalik na dinhi sa siyudad.

Tambag nako niadtong mobiyahe paingon sa probinsya, ang inyong mga driver pakatulga pagsayo sa gabii, ug biyahe mo pagsayo mga alas dos sa kaadlawon.

Naay mga sakyanan nga nagbiyahe, apan sirit lang ang dagan, walay traffic. Pananglit ako, migikan ko dinhi sa siyudad paingon sa probinsya, alas 3:30 sa kadlawon.

Aw, pagka alas singko, didto na ko sa Carcar, ug wa gyud ko ma-high blood kabahin sa traffic. Pagbalik sab nako gikan sa probinsya paingon sa siyudad, migikan ko og gabii, aw sirit lang gihapon.

Tungod sa pagbiyahe nako og kadlawon, ingon man pagbiyahe sa lawom na nga gabii, nakatabang pa ko nga wa makadugang sa graheng problema sa traffic panahon sa adlaw.

Ang usa lang nga angay’ng himoon, pakatulga gyud pagsayo ang inyong mga driver aron dili magduka nga mag-drive ug makamugna hinoon og aksidente.

* * *

Akong pasalamatan ang akong kauban sa Cebu City Traffic Management Board nga si ma’am Ellen Maghanoy, nga misanong dayon sa hangyo nga motabang sa mga traffic enforcers nga mag-duty niining init kaayong panahon.

Si Atty. Kent Francesco Jongoy nga maoy assistant department head sa CCTO, nangayo’g tabang sa mga sakop sa Traffic Board nga makatabang unta niadtong mga traffic enforcers nga mag-duty bisan sa paghatag na lang kanila og tubig nga ilang mainom.

Tungod niini, si ma’am Ellen Maghanoy nga nagrepresentar sa mga modernized PUJ diha sa Board, mitanyag dayon nga mohatag siya’g 500 ka botelya sa half-liter nga mineral water.

Ang ubang kwartahan nga sakop sa Board wa pa hinoon makasanong sa hangyo ni Atty. Kent, kay wa pa tingali makabasa pero nakasiguro ko nga mohatag sab sila.

* * *

Busa kamong mga traffic enforcer, hinumdumi gyud ninyo kanunay nga ang inyong mga opisyal, nagtan-aw gyud sa inyong kaayuhan.

Mao nga ayoha ang inyong pagserbisyo. Timan-i nga usa sa inyong mga tahas mao ang pagpahapsay sa trapiko, dili ang pagsige og pagpanakop.

Makita man gud nako nga magpundok ang mga traffic enforcers, magtinagutlo, imbes magbuwag-buwag aron maayo ang pagkadumala sa trapiko.

Diha dapit sa Sudlon sa Lahug, ug diha sa JY Rotunda, usahay makita nako nga magpundok ang mga enforcer. Para nako, dili na maayo ang inyong gihimo.