HB NO. 9931

Gipalabang ni Kongresista Lordan Suan sa unang distrito sa Cagayan de Oro ang balaudnon nga House Bill No. 9931 nga giulohan og HEARTBREAK RECOVERY AND RESILIENCE ACT. Tinguha ning maong balaudnon nga hatagan og pagtagad ang epekto sa trabaho sa mga empleyado nga nasakitan tungod sa kapakyas sa ilang gugma.

Nagkanayon si Suan nga ang balaudnon nga iyang gipalabang magsilbi kining suporta sa gibati sa mga kawani nga nagpauli pa gikan sa kasakit nga mugna sa kasingkasing nga gigusbat.

Ubos sa balaudnon hatagan og walay bayad nga 30 ka adlaw nga leave ang mga kawani nga gibuwagan sa ilang mga hinigugma. Hinuon kadto lang mga daga ug ulitawo nga gibuwagan sa ilang mga uyab o hinugugma ang makapahimulos sa tumong sa balaudnon ug walay labot ang mga minyo nga magbuwag.

Unsay basihanan sa kongresista sa pagpalabang sa HB No. 9931? Ang iya lang ba nga gibati ug pagbati? Aduna bay datus nga gibasihan ang kongresista sa pagpalabang niya sa balaudnon sama sa pagtuon nga gihimo sa Social Weather Station (SWS) o Pulse Asia o uban nga survey agency nga nag-ingon nga daghan nga kawani sa mga pribado o publiko nga buhatan ang dili maayo og performance sa ilang trabaho tungod kay gibuwagan sa ilang mga uyab o hinigugma?

Samtang ang pagpreserba sa performance sa trabaho sa mga kawani sa pribado o gobiyerno nga  gibuwagan sa ilang hinigugma ang gitumong sa balaudnon, wala ra gihapon kini epekto ngadto kanila tungod kay wala silay madawat nga suweldo sa 30 ka adlaw diin sila maka on leave kay ang ilang leave walay bayad.

Sa kadaghan nga suliran sa nasud nga nanginahanglan og dinalian nga pagtagad sa mga magbabalaud, ang paghatag pa gyod og emotional support sa mga kawani nga gibuwagan sa ilang hinigugma ang nahuna-hunaan ni Kongresista Suan?