Halloween nga palain

Sa wali ni Rev. Father Aloysius ‘Love’ Alojipan sa miaging Nobiyembre 1, 2023, alas 6:30 sa buntag nga misa, iyang gisingit ang nahitabong Halloween Party nga gihimo sa mga batang nagtungha sa Our Lady of Guadalupe Pre-school Development Center, sa milabayng Oktubre 30, diin aduna gyoy Holy Mass nga gipahigayon.

Medyo mitingkag ang dalunggan sa mga manimbahay. Kay numero uno bayang kritiko ang simbahang Katoliko ning gipauso sa America nga Halloween Party, diin magsul-ob og biste sa mga yawa, o makahahadlok nga bayhon sa mga ikogan ug sungayan ang kutob sa moapil ning maong pangnegosyong kalingawan.

Unya, malipayon pa hinuon niya kining gipanabi panahon sa iyang homily? Nausab na ba diay ang baroganan sa simbahan?

Gani, may inahan nga nasuko pag-ayo sa iyang 9-year-old daughter dihang nakalimot hain ibutang ilang attire para pang-Halloween kay moadto na sila sa mga tindahan sa mall nga manghatag og gifts sa mga batang magmaskarag ungo-ungo o kalabera.

Mao nga gisaway g'yud kini sa Katolikong simbahan ug kaparian. Apan makapahibulong? Nganong daw malipayon pa si Fr. Love nga mipahibalo sa mga nanimbahay nga mipahigayon pod ang pre-school sa Guadalupe Parish Church og Halloween? Diin, matod pa niya: “Kon nakatambong pa lang kamo sa maong Halloween, daw inyong masinati nga kamo anaa sa paraiso.”?

Misamot pag-iknat akong kilay sa iyang gipamulong. Gikontra man god sa simbahan ang Halloween Party. Unya, nganong gitugot na man kini diha sa eskuylahan sa iyang parokya?

Unya kalit lang naamang akong hunahuna dihang si Fr. Love mipasabot nga mora kunog anaa ka sa paraiso sa maong Halloween tungod kay ang gipangsul-ob sa kabataan ug tanang miapil pulos pupareho man sa mga sapot nila ni San Francisco de Assisi, San Pedro Calungsod, Santa Teresa ug uban pang Santos ug Santas nga atua na sa langit.

Pagkanindot sa simpleng twist apan puno sa kamatulon-anon nga pamahayag. Nagsangyaw nga ang maong pinalaing Halloween Party ikalipay sa atong Ginoo kay Siya ug ang matahom imahe nga gibilin sa mga Santos-Santas dinhi sa kalibotan, kinsa milampos pagtuman sa Iyang kasugoan, mao man ang gisunod ning maong Halloween, ug dili ang iyaha sa demonyo.

Unta makapahigmata kini sa atong kaigsuonang nahisalaag.