Pamalandong matag Domingo

BEC Bag-ong Simbahan

gikan sa Daang Modelo

Hunyo 4, 2023: Domingo

sa Santisima Trinidad (BEC Sunday)

Mga Pagbasa: Ex. 34;4b-6, 8-9/Dn. 3/2 Cor. 13;11-13/Jn. 3;16-18

Nahimong programa halos sa tanang Artsidyosesis kining Basic Ecclesial Communities kun ang Gagmay’ng Kristohanong

Katilingban ug uban pang mga pagya o tawag kalabot niini. Nahimong inspirasyon ning maong matang sa pagkinabuhi sa mga

unang Kristohanon diin anaa ang panag-ambitay sa bisan unsa nga anaa kanila, pagpamalandong sa Pulong sa Dios, ug ang

makanunayong panagtagbo aron isip usa ka katilingban diha sa pag-ampo.

Karong Domingoha gisaulog man nato ang Solemnidad sa Santisima Trinidad. Niadtong nagtungha pa ko sa seminaryo daghan

kaayo ang mga authors nga naghisgot ug nagtuki kalabot sa Misteryo sa Santisima Trinidad.

Apan alang Kanako mas masabtan nato ang Santisima Trinidad diha sa natad sa kalambigitan. Ang doktrina nagkanayon: “Dunay

usa lamang ka Dios diha sa Tulo ka mga Persona. Amahan, Anak ug Espiritu Santo. Managsama lamang ang ilang kinaiya bisan

pa man sa ilang kalainan. Gani, si Bruno Forte dunay libro nga nag-ulohan: The Church is the Icon of the Trinity.

Kun ang simbahan, hulagway sa Santisima Trinidad. Kining maong matang sa Ecclesiology maoy gipaningkamotan sa simbahan

universal man o local nga mahatagan gyud unta og katumanan.

Mao nga dinhi sa atong lokal nga simbahan nga gipanghingusgan ang pagpalig-on sa atong progama sa BEC. Unta dili lang kini

mahitungod sa mga output nga atong mahatag ngadto sa kadaghanan kondili kita mismo nga nilihok alang niini ang madasig usab

sa paghandum sa Diosnong gugma nga gipakita ug gihimong mabuhi diha sa mas konkretong mga lakang sa pagluwas sa

katawhan nga naulipon sa mga makasasalang Sistema.

Kining maong kawsa padayon gihapon natong gipanglimbasogan sa tinguha diha sa panabang sa Dios, mahimong matinuod ang

paghari sa Dios dinhi sa yuta.