Abunda na ang tubig

Sa katapusan, miabot na gyud ang gipangandoy sa mga lumolupyo diri sa Barangay Busay ug ubang mga dapit nga way koneksyon sa tubig sulod sa dugay na nga katuigan.

Kaniadtong Sabado, kami diri sa ibabaw nga bahin sa Barangay Apas ug Barangay Busay, maoy una nga nakapahimu’s sa pag-agas na sa Lusaran-Busay Bulk Water Project sa MCWD.

Pwerteng kusoga sa bul-og sa tubig nga ang karaan namo nga mga linya, nangabuslot gud ug kinahanglang ilisan. Apan way problema kay anaa na may tubig kanunay.

Salamat kaayo sa JE Hydro nga gidumala ni Engr. Joffrey Hapitan nga maoy naninguha nga ang tubig gikan sa Barangay Lusaran madala diri sa Barangay Busay.

Dili sab ko malimot pagpasalamat sa mga sakop sa MCWD Board nga gipangulohan ni Atty. Joey Daluz III kay sila maoy nagplano gyud nga ang tubig sa Lusaran anhi ipaagi sa Busay aron makatubig ang mga taga bukid.

Pwede ra baya gyud nga adto ibuga ang tubig sa Barangay Talamban kay duol ra kaayo sa Lusaran, ug gamay ra’g gasto, apan gitan-aw sa MCWD nga makatubig kaming dia sa bukid.

Sayonan ka nga nag-antos mi pagpalit og tubig nga P85 ang cubic meter (lima ka baril) gikan sa mga nagpa sub-connection, unya mobayad pa mi og P2,500 aron pakonektahon mi nila?

Ang tubig sa MCWD mga P20 ra ang cubic meter (lima ka baril), apan wa mi mahimo ug mapugos mi pagpalit og tubig nga mahal kay wa pa may linya diri sa bukid ang MCWD.

Maayo gani kay ang kanhi general manager sa MCWD nga si Rene Mercado nalooy nako kaniadto ug gipatauran mi niya og koneksyon, 19 ka balay.

Ako ra unta ang iyang tauran, apan mihangyo ko nga apilon na lang ang akong mga silingan. Mao kadto nga nangita sila og mga subra nga water pipes ug gigamit para sa among water connection.

Kay di man gihapon makaabot ang pressure sa tubig diri sa among dapit sa bukid, magpasalamat sab ko kay ang MCWD ubos sa administrasyon karon ni Atty. Daluz, kanunay gyud nga naghatud namo tubig.

Dili sa miaging mga sakop sa Board sa MCWD nga nagpakabuta-bungol lang sa among mga hangyo, bisan og ang uban unta kanila amo ra nga mga kaila.

Dihang mibanos na si Atty. Daluz sa katungdanan isip MCWD chairman, nangabang ang MCWD og mga water tanker aron manghatud og tubig sa mga dapit nga dili maabot sa pressure.

Salamat kaayo ni Engr. Michael Diola sa MCWD water distribution, ni General Manager Edgar Donoso ug Engr. Edgar Ortega nga maoy pirme nako nga tawgon kon wa na mi tubig.