Heavenly spotlight sa Birhen sa Regla

Nagmalamposon ang gipahigayon nga fluvial procession sa imahen sa Nuestra Señora Virgen dela Regla sa dakbayan sa Lapu-Lapu niadtong Sabado nga mainiton nga gihangop sa mga deboto.

Unang gipahigayon ang misa sa simbahan sa Barangay Marigondon dayon gidala didto sa roro port sa lungsod sa Cordova diin nag atang ang mga Cordovanhon ug dayon gisakay sa fastcraft alang na sa procession sa dagat pabalik sa dakbayan sa Lapu-Lapu diin nahimutang ang simbahan.

Pagdunggo niini sa Muelle Osmeña port sa Barangay Poblacion gisugat kini sa mga opisyal sa dakbayan pinangulohan sa first couple nga silang MayorJunard Ahong Chan ug Congresswoman Cindy King Chan nga nangunay sa pagpas-an sa imahen padung sulod sa simbahan.

Samtang ang Oponganon nag atang sa giagian sa mahal nga birhen nga excited kaayo, ang uban gani emotional balon ang ilang mga pangamuyo.

Makapanglimbawot sa balhibo nga nahibalik na kita sa naandan nato nga gipangbuhat tungod sa hugot nato nga pag-ampo nga gidungog sa atong Labaw nga Makagagahum.

Kini ang paghibalik sa dakong kalihokan sa fiesta sa patrona sa Opon human sa duha ka tuig nga wala napahigayon tungod sa pandemic.

Ako lang ipaambit ang personal nako nga kasinatian atol sa fluvial procession, ambot kong nabantayan ba sa uban nga sakay sa fastcraft, hilabihan ka baga sa dag-um ug nibundak pa gani ang ulan.

Akong nabantayan nga taliwala sa itom nga dag-um aduna may gamay’ng bangag nga giagian sa hayag sa adlaw ug ang bidlisiw didto padung sa imahen.

Tapad nako niadtong higayona si Lapu-Lapu City Councilor Eugene Espido nga nakabantay usab sa akong nakita. Matud niya nga milagro ang among nasaksihan ug mao usab ang akong pagtuo nga ako gani nanglimbawot ang balhibo.

Makita man gani na sa akong live streaming kay akong gitutok ang camera sa adlaw nga nigimaw sa maitom nga dag-um ug ang iyang siga padung sa imahen.

Para nako, ang dako nga milagro mao ang atong kaluwasan gikan sa kalisdanan ug mga dagko nga pagsulay nga atong naagian.

Sama sa itom nga dagum ang atong kahimtang sa pandemic apan padayon kitang gihatagan og suga sa paglaum sa atong langitnong inahan nga maoy nangama ngadto sa iyang anak nga si Hesus.

Sa Nobiyembre 21, ang fiesta sa Mahal nga Berhin sa Regla ug gilauman nga modagsa ang mga deboto sa naasoy’ng adlaw dili lang sa pagpangayo og milagro kondili sa pagpasalamat usab sa milagro nga nadawat.