Public Service Act: Makaayo o makadaut

Gipirmahan ni Presidente Rodrigo Roa Duterte niadtong Marso 21, 2022 ang Akta Republika Numero 11659 nga nag-usab sa Commonwealth Act Number 146 o Public Service Act (PSA) nga 85 anyos na ang edad.

Tumong sa Kongreso sa pag usab sa Public Service Act o (PSA) mao ang pag abli sa mga mahinungdanon nga sektor alang sa foreign investment nga maoy nakita sa gobyerno nga magtugot sa dugang kompetensiya sa serbisyo ug produkto, magmugna og dugang trabaho nga makapalambo sa ekonomiya nga gipalukapa sa pandemiya.

Sa iyang pagpirma sa giusab nga balaud, gipasalamatan sa Presidente ang kongreso tungod sa napakapanahon nga pag-usab sa Public Service Act (PSA) tungod kay makatabang kini sa pagpabangon sa ekonomiya nga gipalukapa sa pandemiya. Ang pag usab sa PSA ug Foreign Investments Act makatabang sa pag stimulate sa ekonomiya ilabi na sa lokal nga negosyo.

Nagtuo ang Presidente nga ang pagpaluag sa mga balabag o restrictions sa equity makadani og dugang mga langyaw nga mga magpapatigayon nga mobobo sa ilang puhonan dinhi sa nasud, magmoderno o magbago sa nagkalain-laing sektor sa public service ug magpalambo sa pagpaabot sa mga gikinahanglan nga serbisyo.

Ubos sa bag-o nga PSA, ang distribution ug transmission sa elektrisidad, petroleum ug mga produktong petrolyo, pipeline transmission systems, water pipeline distribution system, sewerage pipeline system, seaports and public utility vehicles gikonsiderar nga public utility. Ang industriya nga wala malakip sa listahan ikonsiderar nga public service nga i-liberalized apan subject sa national security safeguard.

Ang bago nga PSA magtugot na sa mga langyaw nga negosyante nga makapanag-iya o makaapil  og negosyo nga 100% na dinhi sa Pilipinas.

Ubos sa 85-anyos na nga PSA wala tugoti ang mga langyaw nga negosyante nga makapanag-iya og negosyo 100% dinhi sa nasud. Gitugotan lang sila nga makapang-iya og negosyo nga kutob lang sa 40% sama sa Telecommunication ug Transportasyon.

Makaayo kaha sa Pilipinas ang bag-ong Public Service Act? Dili kaha kini mahisama sa Downstream Oil Industry Deregulation Law nga naghatag nato og kasakit ug kalisod?