EDITORYAL - Pagtabang sa PWDs

Napasar na ang ordinansa diha sa Konseho sa Dakbayan sa Sugbo ang ordinansang dako og matabang sa sektor sa mga persons with disabilities sa siyudad. Ang ordinansa nga gipangamahanan ni Konsehal Leah Japson nagpaabot nalang sa pirma ni Mayor Edgardo Labella, gipasar sa konseho niadtong Miyerkules sa hapon.

Pinaagi sa maong ordinansa adunay tukorong opisina nga pagatawgong Persons with Disability Affairs Office nga motutok sa mga panginahanglan, prebilihiyo, benepisyo, serbisyo, patas nga pagtagad, proteksiyon sa katungod uban pa sa mga PWDs sa siyudad.

Ang mga PWDs adunay katungod sama sa uban. Apan tungod kay ang uban kanila adunay mga espesyal nga panginahanglan ug atensyon gikinahanglang aduna silay espesyal sab nga buhatan nga makatabang aron moaksyon niini.

Ang Pilipinas wala magkulang sa mga PWDs tungod sa kadaghan sa mga balaod nga napasar alang sa maong sektor aron dili sila makasinati og diskriminasyon, patas nga pagtagad ug paghatag og atensyon sa ilang mga yangungo.

Sama sa mga senior citizens, ang mga PWDs adunay katungod nga mahatagan og patas nga pagtagad subay sa nalatid sa Republic Act 7277 o mas naila nga Magna Carta for PWDs ug Republic 10524 nga nagpalapad sa Magna Carta ug gilatid ang mga prebilihiyo alang sa mga PWDs.

Lakip sab ang Batas Pambansa Blg. 344 (Accessibility Law), Republic Act 6759 (White Cane Act) and ILO Convention No. 159 (Vocational Rehabilitation of Persons With Disability) ug ang mga nahaunang mga balaod nga gihisgotan sa taas.

Pinaagi niining mga balaora nahatagan og pabor ang PWDs sama sa mga diskwento sa presyo sa mga batakang palaliton ug proteksyon sa balaod, edukasyon, panglawas ug uban pa.

Apan subo lang gihapon nga dunay pipila ka mga establisamento, mga buhatan, mga kompanya o institusyon wala motuman niini ug duna pa gihapoy pagduhaduha sa kapabilidad ug abilidad sa mga PWDs.

Kining buhatan para sa PWDs nga tukoron sa Cebu City dako kini og matabang pagtabang kanila.