Mas bililhon ka pa kay sa mga langgam

HUNYO 21, 2020: Ikanapulog-duha nga

 Domingo sulod sa tuig

Mga Pagbasa: Jer. 20;10-13/Sal. 69/

Rom. 5;12-15/Mt. 10;26-33

Ning panahon sa dakong kalisdanan, daghan nato ang mahadlokon dako uyamot sa atong seguridad labina kun maghisgot kita og maayong ekonomikanhong kinabuhi.

Daghang mga patigayon ang napagan ug daghang mga trabahante ang nawad-an og panginabuhian samtang ang atong mga lider karon naggambalay og mga lakang aron mapakita nato ngadto sa Tsina nga ang Pilipinas kabahin sa ilang prayoridad. Ambot lang kaha. Mao nga daghang mga tawo karon ang nahimong diskontento na gyud kaayo sa mga panghitabo ug sa mga pamaagi karon. Gubot pa ang kalibotan nia, gubot pa ang atong nasud ug samot nang gubot pa sab ang mga pamilya nga apektado kaayo.

Ang ebanghelyo naghisgot sa linain nga panlantaw, dili angay nga mahadlok ni malisang kay ang matag tawo mas mahinungdanon pa kay sa langgam.

Giatiman man gani sa Dios ang mga langgam samot na kitang mga tawo. Ang mahinungdanon mao nga mosalig lamang ug manlimbasog kay diha sa atong tagsatagsa ka mga kakulangan ug kahayangan ang Dios mopuno. Sa pagpuno sa Dios niini mas mopatigbabaw ang iyang Himaya kaysa atong kaugalingong dungog.

Ang gugmang Diosnon dili lang espiritohanon kondili konkretong gipasinati kanato pinaagi ni Jesu-Kristo iyang anak nga atong Ginoo. Ang pagtulon-an nga iyang gitudlo nakasentro man sa Gugma sa Dios. Ang mga milagro  nga iyang gipanghimo nakasentro man sa Gugma sa Dios ug ang iyang kinabuhi gani mismo, gugma man sa Dios alang kanato! Sa  matag higayon nga moduol kita sa mga sakramento gipasabot sa Dios nga anaa siya sa mga mahinungdanong panghitabo sa atong kinabuhi gikan sa atong pagkahimugso hangtud na sa atong kamatayon.

Ingon ana kita ka dako og bili alang sa iyang mga mata.

Busa angayan lamang nga magpasalamat kita niini dili ba? Tinuod lisud ang akong naagian apan sa katapusan pasalamat ko sa kahitas-an kay bisan sa akong kadautan kinabuhi ko sa gihapon iyang gilugwayan!