Naa gyud ang pagsakripisyo

Dunay mga estudyante nga kanako miduol aron mangutana. Ako pud gitubag ang ilang mga pangutana. Apan sa kaulahian usa kanila ang niangal nga lisud gyud kuno ang ilang pagtungha. Hinuon dili man ikalalis nga lisud kay siyempre buot baya nilang mamahimong accountant ug nga dili usab bastabasta ang tunghaan nga ilang nasudlan. Ako silang giingnan nga normal ra gyud nang sakripisyo. Bisan kun mahuman na sila sa pagtungha anaa gihapon kana.  Sa akong tan-aw karon, daghan sa mga tawo ang nahimong less tolerant na kaayo sa bisan unsang discomfort sa kinabuhi. Daghan nato ang buot mangita og instant sa tanan nga atong pagabuhaton. Gikab sa pagkaon ug tingali hangtud na lang pud sa relasyon.

Ang pag-antos dili usa ka silot aron lamang ang tawo makat-on. Ang pag-antos pahimangno nga dinhi sa kalibutan anaa gyud ang proseso ug ato gyud ning tahuron. Ikaduha, diha sa pagsakripisyo makakat-on kita sa birtud sa pagpailob. Kay kun way pailob malisud alang nato ang pag purify sa atong tagsa tagasa ka mga motivations.

Didto sa kaulohan atong nakita si Panelo nga nihimo sa “commute challenge.” May nidayeg, may nisaway. Ang iyang kasinatian kadiyot ra man ug tingali sa maong kadyot nga kasinatian kay dili man siya nanghinan-aw-ang kondili naghunahuna pud. Apan bisan pa og unsaon niya og hunahuna ang maong problema sa trapiko magpabilin ug posible nga mograbe labina kondili himuon nga limitahan ang mga sakyanahan ug mangita og laing mga alternibo agig sulbad sa maong problema. Apan balido pud baya ang iyang giingon nga disiplina ang kinahanglanon. Mata og sayo aron makaabot sa trabaho og sayo.

Apan sa laing bahin ang mawala niini mao man ang kahigayonan nga makapahuway og husto. Ang tawo kun mao ning kalakiha kanunay gyud nga magdali. Ang maong pagdali maoy nakapahimo sa tawo nga mas motrabaho dili aron mabuhi kondili aron mamatay. Tinuod anaa ang pagsakripisyo apan wa kini magpasabot nga tuyoan gyud nato ang bisan unsa nga makadaut nato.

Wa pud kini ma gpasabot nga pilion nato ang dalan nga mas paspas ug sayon bisan pa man kun kini delikado. Hinunoa ang kinabuhi sa moderation kinahanglanon aron kinabuhi ta madagayaon.

Ang kinabuhi dili tam-is kon hawa sa pagsakripisyo ug pag-antos. Kay way paningkamot nga sayon, ang tanang paningkamot tuod malisud apan kun dad-on nato kini uban ang pagtuo ug paglaum. Ang tanan mamahimong gaan alang kanato.