Overacting

Wala gyud ko makauyon sa “overacting” ra kaayo nga reaksyon sa mga sakop sa Metro Cebu Bridge Management Board aron kuno maalkontrahan ang gihimo sa pipila ka tawo nga maghikog pinaagi sa pag-ambak sa Mactan bridge.

Sa laktud nga pagkasulti, “OA” ra kaayo sila uy. Kapugngan ba gud nimo kon ang usa ka tawo motinguha gyud nga maghikog? Gawas nga padestinohan og mga polis nga mobantay sa duha ka taytayan nga nagdugtong sa Mandaue ug Lapu-Lapu, may lain pa silang himoon.

Dili na tugotan ang mga tawo nga molakaw agi sa daplin sa tulay nga gidesinyo isip pedestrian lane. Dili na itugot nga padaganon o sakyan ang bisekleta kon moagi diha sa tulay. Aw, kaniadto hinoon, gidili man gyud nga pasakyan ang bisekleta diha sa tulay.

Apan ang mga tawo nga maglakaw lang wala did-i. Tan-awa ra gud, kadakong hasol nga nahimo niining “reactive measure” sa mga sakop sa Bridge Management Board?

Pasagdi ninyo kanang mga tawo nga wala na ganahi nga mopuyo dinhi sa kalibotan.

Ayaw ko’g ingna nga kon dunay mga tawo nga maghikog pinaagi sa pagsaka sa layog kaayong lubi, unya moambak aron mamatay, inyo na sab nga pabantayan ang kalubihan?

Ayaw ko’g ingna nga kon dunay mga tawo nga maghikog pinaagi sa pag-ubog sa dagat ug maglumos, pabantayan nato ug mga polis ang dagat.

Kon inyong tagdon ang mga tawo nga maghikog pinaagi sa paggamit sa atong mga government resources, mogara kana sila.

Ang mga polis nga pabantayon ninyo diha, magamit tingali sa pagpatrolya apan dili kay magbantay sa taytayan aron walay makalakaw agi sa daplin.

Porbida gyud kining paagiha. Apan kamo man maoy mga anaa sa katungdanan, kining ako igo lang sa paghatag ninyo og komentaryo nga dili tukma ang inyong pagahimoon.

Kon ang usa ka tawo tawon mahutdan ug kuwarta ug gusto niyang maglakaw lang paingon sa Lapu-Lapu agi sa tulay, dili na siya makapauli?

Unsa man go’y mahatag nga kadaot kon dunay mga moambak diha sa tulay? Pasagdi na sila nga wala na ganahi dinhi sa kalibutan.

* * *

Ngano nga mora’g wala na man kaayo’y ganahan nga motambong sa mga pagsaulog sa adlaw’ng natawhan sa mga tawo nga giilang “bayani” ingon man kadtong matud pa nakahimo og dalaygong buhat atol sa ilang panahon?

Si Vice Mayor Mike Rama wala malipay kay ang mga kawani sa Cebu City Hall nga gipatambong sa President Osmeña Day, igo lang namirma, dayon nanglakaw. Wala nila hunahunaa nga kadto ra gyud ang gipangayo kanila kay dili man sila motrabaho sa maong higayon.

Wala man gud sila masayod kon unsay mga binuhatan sa giilang mga bayani ug kon unsay indirekta nga natabang niini kanila.