Lipat-lipat

Gipalabang ug giuyonan sa mayorya sa mga sakop sa konseho sa dakbayan sa Sugbo nga kaalyado ni outgoing Mayor Tomas Osmeña ang resolution nga nagmando sa abogado sa dakbayan nga ipasaka ang kaso nga magpainbalido sa kontrata nga gisudlan sa kagamhanan ni kanhi Mayor Mike Rama niadtong Agosto tuig 2015 nga nagbaligya sa 45.5 ka ektarya luna sa South Road Properties (SRP).

Niadtong Agosto sa tuig 2015 nagkumboya ang tulo ka dagkong kompanya (Ayala Land, Cebu Holdings Inc. ug SM Prime Holdings ) sa pagpalit sa 26. 3 ka ektarya nga luna sa SRP sa kantidad nga P10,009 bilyones samtang ang laing kompanya (Filinvest Land Inc.) ang mipalit sa 19.2 ka ektarya sa kantidad nga P6.7 bilyones.

Kining maong baligya sa luna sa SRP nga gitawag og negotiated sales on installment ang giingon sa mga sakop sa konseho nga kaalyado ni outgoing Osmeña nga inbalido sa pagsugod pa lamang tungod kay wala kini gipaagi sa bidding ug wala gani gyod kini bidding ug gidiritso sa negotiated sales on installment.

Segun sa balaud, ang negotiated sales himuon lamang kun adunay failure of bidding. Ang failure of bidding madeklarar lamang kun walay miapil sa gipatawag nga bidding.

Giingon usab sa kaalyado ni Osmeña nga walay pagtugot sa Commission on Audit ang baligya ug daghang gikinahanglan nga proseso nga sundon ang wala sunda ni Rama dihang gibaligya niini ang luna sa SRP.

Apan sa pagkatinuod, usa ka kanhi prosecutor nga ginganlan og Romulo Torres ang mipasaka na og kaso kaniadto kay gikwestiyon niini ang legalidad sa matang sa pagbaligya sa nahisgotan nang luna sa SRP ug ang maong kaso miabot sa Court of Appeals diin ang nahisgotang taas nga hukmanan mideklarar sa baligya nga balido ug legal. Gawas niini, wala usab mopagawas og kamandoan ang Commission on Audit nga nagdili sa maong matang sa baligya.

Kun maminaw lang ka sa kampo ni Osmeña ug sa iyang mga kaalyado sa konseho sa dakbayan sa Sugbo makaingon gyod ka nga inbalido ug dili legal ang pagbaligya sa gobyerno ni Rama sa luna sa SRP ngadto sa mga nakapalit niini. Pero kun imong usisahon imong madiskobrihan nga gilipat-lipat lang diay ta ni Osmeña ug sa mga kaalyado niya.