Lanog nga mensahe
LINTUNGANAY - Fred Languido (Banat) - May 16, 2019 - 12:00am

Sipa ug lanog ang mensahe sa bag-o lang nahuman nga midterm elections.

Wala pa mohupas ang pagsalig sa publiko ni Presidente Rodrigo Duterte bisan pa sa mga pagsaway sa giingong abuso sa iyang kampanya batok sa illegal nga drugas. Ang mga sakop sa oposisyon mihulagway sa wala pa ang eleksiyon nga ang maong piniliay magsilbing referendum sa pamunoan ni Duterte.

Anhi kuno masukod ug makita nga wala na makaayon ang kadaghanan sa iyang pamunoan.

Apan bali ang nahitabo. Sa nagpadayong canvassing sa pagkasenador makita nga way usa sa mga kandidato sa oposisyon ang makasiguro og kadaugan.

Sa pagsuwat ko niining lindog bugtong si Bam Aquino lang sa Team Otso Diretso ang nakakapyot sa magic 12 ug namiligro pa nga matagak.

Ang mga gituboy ni Duterte komportable sa ilang labaw. Bisan dinhi sa Sugbo, hapit tanang gisuportahan sa presidente nagmalampuson.

Pananglitan sa Cebu City, kinsay magtuo nga ang gihulagway nga way kwarta nga si Bise Mayor Edgardo Labella modaog batok sa incumbent, kwartahan ug beteranong politiko nga si Mayor Tomas Osmeña?

Sa dakbayan sa Lapu-Lapu, lisud tuohan nga ang kapitan nga si Ahong Chan nga kapila na mapildi modaog pagkamayor batok ni Arturo Radaza?

Ug ang labing dakong kadaugan nakab-ot sa batan-on nga kanhi mayor sa lungsod sa Liloan nga si Duke Frasco. Sukad niadtong dekada 40 way milampos pagbuntog sa paghari sa pamilyang Durano sa kinto distrito sa Sugbo. Apan sa miaging Lunes gibuntog ni Frasco ang goliath sa politika sa 5th district. Gipildi ni Frasco ang kanhi kongresista nga si Red Durano.

Si Frasco maoy kandidato ni Presidente Duterte nga paryente mismo sa pamilyang Durano.

Sa pagka-gobernador namunbon sab ang laing sakop sa banay’ng Durano nga si Bise Gobernador Agnes Magpale batok ni kanhi gobernador ug karon kongresista sa tirsero distrito nga si Gwen Garcia.

Ang tanang mga pagdaut ug pasangil sa korapsiyon wala mosaler.

Usa ka butang ang akong nakita sa resulta sa milabay’ng eleksiyon. Napul-an na ang katawhan sa mga tigpakaaron-ingnon.

Dili na mailad ang publiko sa bulatik apan way agi nga gikapakita. Mas gitukob sa katawhan sa Sugbo ang kampanya nga “buhat maoy pasulti-on” kay sa “Tinuoray lang”. Mas lanog ang mensahe sa buhat kay sa pulong! Kini maoy leksiyon nga angayang hinumduman sa mga buot magpapili sa mosunod nga higayon.

MENSAHE
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with