Kadtong Diyosnong kinaiya ni Cardinal Vidal

Dili siya Cebuano. Kay si anhing Emiritus Cebu Archbishop Emiritus Ricardo Cardinal Vidal natawo man didto sa Mogpog, Marinduque niadtong Pebrero 6, 1931 ug didto magdako sa kaulohan (Manila) hangtod nahimo pari.

Apan ang kalarino na lang gyud niya mosulti’g binisaya diha sa pagpabuhagay sa iyang mga undanong wali.

Sukad sa iyang pagdala sa Archdiocese of Cebu, cool kaayo ang kinaiya ni Cardinal Vidal. Dili siya kaantigo mangaway og mga politiko.

Kugihan siyang mopaambit sa iyang amahanong tambag matag higayon nga may nakita siyang karnerong nahisalaag.

Apan dili siya makig-away kun isalikway sa iyang gitanyagan ang hustong dalan nga iyang gitudlo. Hinuon, sa hilom, iya na lang silang iampo sa Kahitas-an.

Bisan ang nabantog nang mga bagsik sa politika, nakat-on sa pagmahal niya.

Kini tungod sa iyang sa kamainampingon nga walay bisan usa nga masakitan. Ang iyang estilo sa pagpangalagad, dili authoritative. Kondili, informative, suggestive and very apostolic.

Gani, niadtong bag-o pang nakalingkod sa Malakanyang si Presidente Rodrigo Roa Duterte, diin init kaayo ang pagsinabyagay’g kalayo sa Simbahan batok sa pagdumala ni Duterte sa Pilipinas, mibisita man si Cardinal Vidal sa Malakanyang ug didto sa music room, naghimamatay silang duha.

Miyukbo ug mihawok si Duterte sa kamot ni Cardinal Vidal timaan nga iyang girespeto ang pagduaw sa usa sa kinatas-ang lider sa simbahan panahon sa maong krisis. 

Didto nakita ni Cardinal ang tinuoray nga pagkatawo ni Duterte. Matud niya, “He is very simple and humble man.

In fact, he was just wearing slippers in the palace. He is easy to talk with and you won’t be afraid to approach him.”

Matinud-anon pud kuno si Duterte sa pagpangalagad. Busa, nakadayeg siya.

Pagka Oktubre 18, 2017 namatay si Cardinal Vidal. Tungang gabii sa iyang haya, kalit lang mitungha si Duterte sa Cebu Metro Cathedral ug mihawok sa lungon ni Cardinal.

Sa adlaw sa paglubong, Oktubre 26, 2017, gideklarar pa gyud sa Presidente sa Pilipinas nga non-working holiday sa tibuok Sugbo ang maong adlaw aron makahigayon ang tanan nga makatambong sa pagtunod sa haya ni Cardinal Vidal.

Kamatuoran, nga lakip si Duterte, nadutlan sa Diyosnong kinaiya nga gibilin ni Cardinal dinhi sa kalibotan.