Paglimod dili kaipsot sa itaas

Ang pagtudlo og moral values magsugod sa panimalay. Obligasyon sa mga ginikanan ang pag-agak sa ilang mga anak pagpasubay sa matarong dalan sa kinabuhi.

Mao nga nagpasalamat gyud ko nilang anhing Nanay Totang ug Tatay Andot, kinsa bisag ginamos ug buwad ray among saw-an pirme ubos sa busloton namong payag, kanunay nilang isilsil ngari namong mga anak unsa ka tam-is sa matang sa kalipay ang maangkon sa mga binuhat nga nagpuyo sa katarong, kalinis ug kamatinud-anon (honesty).

Kadto lang gibaoran kong Tatay ug Nanay nga dili gyud maligo sa Cambuhawe spring sanglit lawom ang tubig dinhi ug nahadlok sila nga malumos ko, maoy among sabot nga kon dili ko motuman, makatilaw gyud ko’g latigo gikan niya.

Hinungdan, nga dihang mikuyog ko sa akong mga katalirongang bata, mitug-an gyud ko sa tinuod. Bahala na’g sakit kaayo ang mga sanga sa bayabas nga ihapos sa akong sampot.

Ang kahapdos mawala ra bitaw. Pero ang pagpamakak dili gyud mapapas sa atong book of life nga buksan sa Ginoo kon  i-recall na ta Niya.

Hinungdan, nga makalingolingo gyud ko kon dunay tawong mamakak, labi na kon sila mga halangdong alagad sa katilingban.

Kadto lang Malubog killings, diin adunay duha ka nakaikyas sa gipamatay ang mitug-an nga mga polis kuno ang mibira nila, hugtanon kining gihimakak sa kapolisan.

Bisan nanglutaw na ang mga resulta sa nagpadayong imbestigasyon, diin nagtumbok nga ang usa sa mga armas nga napalgan sa crime scene gipanag-iya sa opisyal sa Bureau of Jail Management and Penology-7, mipahayag gihapon ang kapolisan og mga estorya nga dili sila maoy migamit niadto.

Gani, daw gusto pa nilang ipagawas, nga ang usa sa ilang napatay maoy miusar niini. Pastilan, no?

Kinsa ba kanila ang mitug-an sa tinuod? Ang duruha nga nakaikyas, kinsa nakakita gyud kinsay midala-pusil nila,  o ang kapolisan nga wala dayon makatubag dihadiha sa maong pasangil?

Dili ba ang honest nga tawo, makatubag man dayon kon pangutan-on? Kini tungod kay wala man siyay anino nga gikahadlokan.

Hinuon, kon kinsa nila ang namakak unya makalusot, dili sila angay maglipay. Kay walay paglimod nga himoon dinhi sa yuta nga makaipsot sa mga mata didto sa Kahitas-an.