^

Private citizen Mar

ARANGKADA - Leo Lastimosa (Banat) - July 3, 2018 - 12:00am

Nakugang ko pagkadawat og text message gikan ni Mar Roxas (kanhi kalihim sa DTI, DOTC ug DILG, ug kandidato pagka presidente, apan karon ganahan nga ilhon nga pribadong molupyo ning nasura) nga nangutana kon mahimo ba siya nga motambong sa akong programa nga Arangkada sa DYAB Abante Pa, Bisaya! gahapon sa buntag.

Gipahibawo ko niya nga mohapit sa among sibyaanan sa bukirang barangay sa Jagobiao sa Mandaue sa iyang pagsuroy sa Bicol, Samar, Leyte, Sugbo ug Negros.

Apan nakugang gihapon ko pagkakita niya, nga kasagaran mag-Barong ug mag-Amerikana, nga nisulod sa announcer’s booth nga nagpurol.

* * *

Gawas nga nalingaw sa kataas sa iyang panglantaw sa Osmeña Peak sa habagatang Sugbo (nabantang niya ang Negros ug Bohol apan wa kakita sa bulkang Kanlaon tungod sa panganod) ug sa kadaghan sa nagpalitrato uban niya gikan sa pagdunggo sa pantalan hangtud nga nagpatupi sa basement sa Ayala Center, natagbaw sab sa kalamian sa naagian nga mga pagkaon.

Niambit siya sa piyesta sa pinya sa Ormoc niadtong Biyernes ug nagpaluto sa lab-as nga mga utanon ug lumad nga manok sa Mantalongon sa Dalaguete para sa iyang pamahaw niadtong Domingo.

* * *

Klarong nahinangop sa duha ka tuig niyang bakasyon (kanus-a nakasaksi sa gradwasyon sa iyang anak nga nagtrabaho na karon isip web developer sa Silicon Valley) ug paghimo sa mga butang nga wa niya mahimo sa nangatungdanan pa sa gobiyerno. Gani, nagkatawa siyang niapil namong DJ Kimyat sa MOR 97.1 Lupig Sila! sa pag-agpas sa destinasyon ni LeBron James pila ka gutlo sa wa pa ipahibawo ang iyang pagbalhin sa Los Angeles Lakers.

* * *

Dihang among gisungog nga kinahanglan na nga mohukom kon mobalik ba sa politika sa dili pa ang Oktubre nga maoy deadline sa pagpasaka sa certificates of candidacy, nitiaw siya nga nangandam na gyud kay ang adlaw sa piniliay sa Mayo 13, 2019 mao sab ang sumad sa iyang adlaw’ng natawhan.

Gipalili hinuon mi sa iyang panghunahuna. Matud ni Mar nga dako ang tentasyon nga mangiyugpos ug magpakahilom lang.

Apan unsa may mahitabo kon hingpit nga paundayonan ang pamakak ug pangabuso?

Gitataw niya nga angay’ng sa tanang panahon dasigon ang pagpakabana alang sa unsay tinuod ug makiangayon alang sa nasud ug sa katawhang Pilipinhon.

* * *

(leo_lastimosa@abs-cbn.com)

DILG DOTC DTI
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with