Hugaw sa tawo mapahimuslan

Despensa sa mga huyang og ginhawaan, apan ako lang ipaambit ang programa sa Metro Cebu Water District diin ang hugaw sa tawo mahimong magamit og balik nga mapahimuslan alang sa positibong kalamboan.

Usa kini sa solusyon sa pagpanalipod sa kadagatan gikan sa kontaminasyon sa fecal coliform nga makuha gikan sa hugaw sa tawo.

Ang Septage Treatment Plant sa MCWD nga anaa mahimutang sa Barangay San Miguel, lungsod sa Cordova, nagproseso sa mga tae ug ihi sa mga tawo aron maseguro nga dili kini makamugna og kadaot sa katawhan ug sa atong palibot.

Taudtaod na kini nga nag-operate diin unang gi-cater nila ang lungsod sa Cordova ug Lapu-Lapu City, kansang mga konsumidor ilang giserbisyohan.

Kon ang mga consumers magpahabwa sa sulod sa ilang septic tank, mobayad lang og P50 kada buwan sulod sa lima ka tuig, apan kadtong dili kliyente sa MCWD mahimo usab nga maserbisyohan apan mobayad og P3,000. Ang makolektang hugaw iproseso sa planta. Ang unang buhaton mao nga buwagon ang liquid ug solid waste, ug ibutang kini sa managlahing tangke.

Makakolekta sila ug 120 cubic meters nga tubig matag adlaw nga maoy ilang ipaubos sa treatment, samtang 30 cubic meters usab ang solid waste nga ilang makolekta.

Ang treated water dili pwedeng mainom, apan gibutang kini sa class- C sa water standard nga pwede na nga gamiton pagbalik isip pangbisibis sa mga tanom, panghugas sa mga sakyanan ug mahimong gamiton nga tubig sa mga recreational pools.

Ang solid waste gihimong filling materials ug gitun-an nga himoong abuno sa mga tanom. Dili nako ma-imagine nga manghunaw gamit ang tubig nga recycle gikan sa hugaw sa tawo, apan giingon lagi nila nga psychological lang kini apan maanad ra kita sa kadugayan. Pastilan.

Luod paminawon apan “amazing” ang teknolohiya nga ang mga butang nga dili na gyud unta haum gamiton, mapahimuslan man diay alang sa kaayohan.