Balido ang pagsupak

Naputos sa mga pagsaway si Konsehal Dave Tumulak human niya iduso ang pagsul-ob og mga “reflectorized vest” sa tanang magmaneho ug magsakay og motorsiklo dinhi sa dakbayan sa Sugbo panahon sa kagabhion.

Tumong kuno niini aron kapanalipdan ug luwas ang mga motorista. Matud ni Tumulak nga mas daling makit-an ang mga magsakay og motorsiklo kon magsul-ob sila niining mga reflectorized vest. Nakasabot ko sa tinguha ni Tumulak, gusto siya nga luwas ang mga motorista gikan sa posibleng disgrasya.

Apan dili sab makamahay si Tumulak sa publiko kon sila magduda sa nagpahipi nga motibo niini. Una, tungod kay wala gyud ta makabantay nga niagi ni og public hearing. Hinuon, matud ni Tumulak nga dugay na ang maong ordinansahon ug karon lang napasar sa konseho pinaagi sa pag-usab sa Cebu City Traffic Code.

Balido ang mga argumento sa publiko pagsupak sa maong balaod. Pipila sa mga argumento, gawas sa pasangil nga dunay buot manapi,  mao: 1.) Nganong dili estriktohon sa dakbayan ang pagpatuman sa lagda sa trapiko, sama sa pagsiguro nga dunay suga ang mga motorsiklo, ug, 2.) Nganong dili unahon sa dakbayan pagsiguro nga hayag ang tanang karsada aron makita ang mga motorista.

Unsaon man nimo paglalis niining maong mga argumento nga labihan man ka tukma? Ngano man tinuod nga ipasa man ngadto sa publiko ang kakuwangan nilang mga opisyal sa paghatud sa batakang serbisyo, sama sa pagpasuga sa kadalanan?

Kon hayag lang ang atong kadalanan, duna’y suga ang tanang poste, wa’y peligro sa disgrasya, gawas lang kon magkiat gyud ang magmaneho. Salamat nga sensitibo si Mayor Tomas Osmeña sa reklamo sa publiko, dili kuno niya ipatuman ang maong ordinansa.

Matud sa mayor, maayong himuon lang kini nga “optional” alang sa mga motorista. Hinuon miingon ang mayor nga pabor siya sa pagpaumento sa multa sa mga malapason sa lagda sa trapiko gikan sa P500 ngadto na sa P5,000.