Papahawaon sa kanhi ka live-in nga foreigner

Dear Atty. Divine,

Duna ko’y live-in partner nga foreigner kaniadto  mipalit siya og yuta under my name ug among gitukuran og balay. Nag live-in mi sulod sa lima ka tuig ug wa mi anak. Niadtong miaging tuig  milarga siya sa gawas ug wa na mobalik.

Karong bag-o mikontak siya nako ug iya ko nga gimandoan sa pag-vacate sa balay. Ang titulo niini nakapangalan nako. Ako siyang gisultian nga dili ko mopahawa kay ako man ang registered owner niini  apan gihulga ko niya nga ikiha. Ang akong pangutana puwede ba ko niya nga mapugos sa pagpapahawa sa balay? Kun ikiha ko niya  posible ba ko nga mapriso? — Jessica

Dear Jessica,

Base sa atong batakang balaod ang mga langyaw dili makapanag-iya og real property dinhi sa ato. Kini maoy hinungdan nga ang imong live-in partner mipalit og property under your name  ug tungod kay ang titulo nakapangalan man kanimo  so ikaw g’yud ang tag-iya sa property ug ikaw ang mas dunay katungod.

Busa kun dili ka mopahawa niini wa g’yud siya’y mahimo. Maglisud sab siya sa pagpasaka og kaso batok kanimo bisan pa kun duna moy kasabutan nga pinirmahan nga siya ang tinuod g’yud nga tag-iya sa property kay makonsiderar man ang maong agreement nga nahasupak sa balaod  matawag kini nga void.

Apan kun pananglit mo-file g’yud siya og kaso alang sa pagbawi  sa property, dili sab ka mapriso niini kay Civil case man ang kaso ug dili criminal case. Busa kun dili ka mobiya sa property, dili g’yud kapugos ang langyaw kay ikaw man ang registered owner niini. Thanks and God bless. - Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.