Kalainan sa rebelde kaniadto ug karon
![Kalainan sa rebelde kaniadto ug karon](https://media.philstar.com/images/the-philippine-star/headlines/20170717/BBL-turnover.jpg)
The draft of the Bangsamoro Basic Law is officially turned over to President Rodrigo Duterte. Office of the Presidential Adviser on the Peace Process
Dako na kaayo ang kalainan sa mga rebelde kaniadto, ug ang mga rebelde karon. Buhing saksi niini ang pipila ka tawo nga nahimo na gani karon nga mga opisyal sa atong kagamhanan.
Kaniadto, girespetohan ang mga rebelde kay sila maoy nagsilbe nga sumbanan sa katarong sa bukid. Kadtong mga tawo nga maldito ug kusog kaayo modaug-daog sa uban, apil na sa ilang mga asawa, padad-an dayon og paskin nga kon dili mohunong sa bati nila nga batasan, silotan sila sa mga rebelde.
Tuod, kadtong wala mopatuo ug nagpadayon sa ilang mga binuang, gisilotan og kamatayon. Apan dili manghilabot kaniadto ang mga rebelde sa mga tinugyanan sa balaod, gawas lang kon sila maapekihan na.
Suheto kaayo ko niini kay didto ko nagdako sa bukid. Daghan ang wala masayod, ilabi na ang mga batan-on nga pipila ka opisyal sa kagamhanan dinhi sa Sugbo nahimo g’yud gani nga sakop sa mga rebelde kaniadto.
Usa kanila, miundang g’yud sa iyang pagtungha ug miipon sa pundok sa mga rebelde nga didto nagbase sa kabukiran sa Bais, nga lungsod pa kaniadto sa Negros Oriental, apan karon nahimo na nga siyudad.
Aron sa pagmatuod nga buotan ang mga rebelde kaniadto, usa sa ilang sakop nga karon opisyal sa dakbayan sa Sugbo, dili ka g’yud makatuo nga rebelde kay pwerte kabuotan. Hinayon nga manulti ug matinagdanon.
Kaniadto, ang mga abusadong sakop sa kapolisan ug kakostablehan, kadtong sakop sa Philippine Constabulary-Integrated National Police (PC/INP), mao ra ang kontra sa mga rebelde. Ang mga tarong nga polis ug PC, dili nila kontra.
Apan karon, pastilan, tan-awa ang nahitabo sa unom ka polis sa Guihulngan, Negros Oriental, nangligdas nga wala na’y kinabuhi human nila gibanhigan samtang moresponde unta sa gika-report nga pagbanhig sa usa ka konsehal didto sa Barangay Magsaysay.
Makapaduda man gani nga drama ra sa mga rebelde nga gibanhigan nila ang mga konsehal aron moresponde ang kapolisan ug ilang mabanhigan. Makaingon ko niini kay ngano nga wala man hinoon nila mapatay ang konsehal?
Dili mapasaylo ang mao nga mga rebelde sa ilang gihimo. Tiaw mo, apil sa napatay ang hepe sa kapolisan sa Guihulngan. Ang ako lang sab, ngano nga kumpiyansa ra man kaayo ang kapolisan sa ilang pagresponde?
Makita sa hulagway nga “ambush area” ang maong dapit kay ang karsada anaa kini mahimutang sa ubos sa pangpang. Ang tukma unta nga nagsugo sila og duha ka polis nga mosusi kon luwas na agian ang maong dapit. Sa ato pa, duha ra unta ang mapatay ug makasukol na ang uban.
- Latest