Gugma sa pagtabang

Ang pagtabang maoy labing bililhon nga hiyas sa atong pagkatawo nga ikatandi ang kilatis niini nga mas labaw pa sa lunsay nga bulawan. Ang gibug-aton nga dili matimbang, kay gamay o daku, pareho ra nga hinukad sa kabubut-on nga kinakasingkasing ang pagtabang.

Ang pagpainom og usa ka basong tubig sa tawo, dako na kini nga konsuylo nga natambalan ang gibating kauhaw. Ingon sa makapalipay nga nakahatag kita og lugway sa paglaum nga mabuhi pa sila. Ang kalumo sa mabination nga pagtabang, modayon og kuot nga itunol ang pipila ka sensilyo sa nanginahanglan.

Bisan tuod og ang atong gihimo usa lang ka dinalian nga tabang sa uban, apan makapalig-on na kini sa atong kaugalingon, tungod kay napuno kita sa gugma, nga nahimo na nga tipik sa kinabuhi, ang pagkamatinabangon. Gani, may mga sitwasyon nga usahay ato pa sila nga palabihon, diktar sa dili kabalibaran nga higayon.

Iyawat nga makaiban sa ilang panginahanglan, total duna man ta’y katakos nga kahulipan ang unsa man ang kakulangan sa atong kaugalingon. Kay hingpit man ang atong pagtuo nga kun kita motabang sa uban nga may gugma, pil-on sa makadaghang beses ang katumbas nga dawaton gikan sa Kahitas-an.

Kay gitinguhang mamintin ang makalipay nga mohatag, bisan dili pangayoan, mangita pa’g paagi nga masustenehan nga makabarug ang gitabangan, nga ihaw-as sa kalisud nga tudloan nga dili na magpangayo ug makakat-on sa pagpanlimbasog nga mabuhi sa katarong.

Niini, nagtukod kita’g legasiya, nga kapanaminan nga sundogon kita, nga unsa man ang gihimo natong pagtabang nga matubag ang panginahanglan sa uban, ug natudloan sila nga mahigmata aron sila mabuhi ug motabang usab ngadto sa uban.